Petropavlda kópbalaly otbasylardyń terezeleri qaýipsiz etip jasalýda

PETROPAVL. QazAqparat – Petropavlda balalardyń kópqabatty úıdiń terezesinen qulaýyna jol bermeý maqsatynda «Qaýipsiz tereze» aktsııasy bastaý aldy, dep habarlaıdy QazAqparat tilshisi.

Bul – Petropavl qalalyq ákimdigi men prokýratýranyń ortaq bastamasy. Aktsııa aıasynda joǵary qabatta páteri bar kópbalaly jáne áleýmettik az qamtylǵan otbasylardyń terezelerine arnaıy bekitpeler ornatylyp jatyr.

«Kóppáterli úılerdiń joǵary qabatynda turatyndardy tańdap aldyq. Birer kúnde 35 otbasyny aralap, terezelerine bekitpeler ornatamyz. Bir terezege qoıylatyn qurylǵy 2,5 myń teńge turady. Kópbalaly otbasy úshin bul az soma emes. Óıtkeni bir páterge keminde úsh-tórteýin ornatý qajet», - deıdi Petropavl qalalyq turǵyn úı qatynastary bóliminiń mamany Erlan Qaıyrbekov.

Shahar turǵyny Lıýbov Ýshakovanyń 5 balasy bar. Eń kishileri – 1 jáne 2 jasta. Áıeldiń aıtýynsha, sábıleri qoldy-aıaqqa turmaıdy, únemi nazardy qajet etedi. Búgin onyń úsh bólmeli páteriniń terezelerine arnaıy bekitpeler ornatyldy.

«Baıqamaı qalatyn kezder bolady, mazasyz shaqtary ǵoı. Mamandarǵa alǵysym zor. Byltyr birneshe búldirshinniń terezeden abaısyzda qulap ketkenin estidim. Balalarym úshin alańdap otyramyn», - deıdi qala turyǵy Lıýbov Ýshakova.

Byltyr SQO-da 4 búldirshin úıdiń joǵary qabatynan qulap ketti. Úsheýi sol jerde mert bolsa, bireýi múgedek bolyp qaldy. «Qaýipsiz tereze» aktsııasy alda jalǵasyn tabady.