Petropavlda komaǵa túsken er adam jabyq páterde qalyp qoıǵan

PETROPAVL. QazAqparat – Petropavlda qutqarýshylar komaǵa túsip, jabyq páterde jalǵyz qalyp qoıǵan er adamǵa kómektesti, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, qutqarý qyzmetiniń 112 telefon nómirine Petropavl turǵyny habarlasyp, páterine kire almaı qalǵanyn aıtqan.

Sózine qaraǵanda, áıel K.Sútishev kóshesindegi kóp qabatty úıdiń tórtinshi qabatynda turady. Páterde aýyryp jatqan kúıeýi bar. Ol jumystarymen biraz ýaqytqa shyǵyp ketip, qaıtyp kelgende esikti asha almaǵan. Esik ishten jabylǵan, eshkim jaýap bermeı, tek aýyr tynys alý estilgen.

Oqıǵa ornyna jedel jetken qutqarýshylar temir esiktiń ońaılyqpen ashylmaıtynyn túsinip, ýaqytty joǵaltpaı páterge tereze arqyly kirýge sheshim qabyldady. Mamandar órmeleý quraldaryn paıdalana otyra, kórshi balkon arqyly páterge terezeden kirdi. Sol jerde es-tússiz, boljam boıynsha komada jatqan 1970 jyly týǵan úı ıesin tapty.

Er adamǵa jedel kómek kórsetildi, qutqarýshylar ony zembilmen úıdiń aýlasyna aparýǵa kómektesti, ol jerden jedel járdem brıgadasy alyp ketti.

«Biz ýaqytynda úlgerdik, kómektestik, úı ıesi er adam úshin bári jaqsy aıaqtalady dep seneıik. Biz úshin bul úırenshikti nárse, mundaı jaǵdaılar jıi bolyp turady», - deıdi qutqarý bóliminiń bastyǵy Nurbolat Aısın.