Petropavlda kólikti mas kúıde júrgizgen sheneýnik jumystan shyǵaryldy
Memlekettik qyzmet isteri agenttiginiń SQO boıynsha departamenti baspasóz qyzmetiniń málimetinshe, memlekettik qyzmetshilerdiń arasynda rýlge mas kúıde otyrý faktileri kezdesedi. Byltyr osyndaı eki jaǵdaı tirkelgen.
Taıynsha aýdany ákiminiń orynbasary jáne jolaýshylar kóligi basshysynyń orynbasarynyń isi Ádep jónindegi keńeste qaralyp, olardy jumystan shyǵarýǵa usynys jasaldy. Bıyl Petropavl qalalyq dene shynyqtyrý jáne sport bólimi basshysynyń isi keńestiń talqysyna tústi.
«Mundaı qylyqtar memlekettik qyzmetshige jat bolýy qajet. Shekteýlerdi saqtamaıtyndar memlekettik qyzmetten ketedi. Mundaı isterdi qaraǵanda keńes músheleri zańdy negizge alady. Sol sebepti bul laýazymdy tulǵalar jumystarynan shyǵaryldy», - deıdi Memlekettik qyzmet isteri agenttiginiń SQO boıynsha departamenti basshysynyń orynbasary Janat Jumabaev.
Jalpy byltyr SQO-da Ádep jónindegi keńes 55 isti qaraǵan. Onyń 39-y profılaktıkalyq sıpatta bolsa, qalǵanynda sheneýnikterdiń tártibi talqyǵa túsken. Sonyń 9-ynda memlekettik qyzmetshiler ádep talabyn buzǵan, 7-eýinde memlekettik qyzmetshiniń atyna kir keltiretin is jasaǵan. Onyń ekeýi boıynsha tártiptik is toqtatylsa, qalǵanyna tártiptik jaza qoldaný usynyldy.
«Kópshiligi zań normalaryn bilmeýge, formalızmge salynýǵa jáne memlekettik qyzmetshige jat qylyqqa baılanysty. Mysaly byltyr hattamalyq buıryqqa júrdim-bardym qaraǵan Aqqaıyń aýdany ákimdiginiń 3 qyzmetkeriniń jaýapkershiligi talqyǵa tústi. Al osy aýdannyń ákimi Astrahanka eldi mekeniniń turǵyndarymen kezdesý barysynda teris qylyqqa jol bergen», - deıdi Janat Jumabaev.