Petropavlda kólik júrgizýshisi alty aıda 68 márte jol erejesin buzǵan

PETROPAVL. QazAqparat – Petropavlda «Lada Priora» avtokóligimen júrip, ótken jyldyń qarasha aıynan osy jyldyń sáýirine deıin jol qozǵalysy erejesin 68 ret buzǵan júrgizýshi anyqtaldy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti basapsóz qyzmetiniń málimetinshe, Petropavlda «aqyldy» beınekameralardyń jumysyn taldaı otyryp, ákimshilik polıtsııa qyzmetkerleri qaskúnem buzýshyny anyqtady.

Ol sheteldik tirkeýde turǵan «Lada Priora» avtokóligimen júrip, jarty jyldyń ishinde jyldamdyqty 68 ret asyryp, toqtaý syzyǵynan ótip ketken.

Aıyppuldyń jalpy somasy - 1,5 mln teńge.

Quqyq buzýshynyń derekteri baǵdarǵa engizildi. «MEGAKAM.QORǴAÝ» qosymshasyn paıdalana otyryp, ony patrýldik polıtsııa batalonynyń qyzmetkerleri toqtatty.

35 jastaǵy sheteldikke qysqartylǵan tártippen 700 myń teńgeden astam aqsha tóleýge týra keldi.

Polıtseılerdiń aıtýynsha, bul jalǵyz mysal emes.

Jaqynda Petropavl qalasynyń polıtseıleri bir aıda belgilengen jyldamdyqty 32 ret asyrǵan 22 jastaǵy jigitti jaýapqa tartty.

Saýmalkól eldi mekeninde taǵy bir jyldam júrýge áýesqoı toqtatyldy. Aıyrtaý aýdanynyń 27 jastaǵy turǵyny bıyl 16 ret jol qozǵalysy erejesin buzǵan.

Ekeýi de reseılik esepte turǵan «VAZ» avtokólikterin basqarǵan. Olar «aqyldy» beınekameralardyń kómegimen anyqtaldy.

«Oblysta jol qozǵalysy erejesin buzý derekterin avtomatty túrde tirkeıtin 35 vıdeojúıe jumys isteıdi. Apparattyq-baǵdarlamalyq keshender jol-kólik oqıǵalaryn jıi týdyratyn baǵdarshamnyń tyıym salý sıgnalyna ótý, jyldamdyq rejımin buzý faktilerin anyqtaıdy. Olar polıtsııanyń senimdi quraly, jyl basynan apparattardyń kómegimen SQO joldarynda 20 myńnan astam quqyq buzýshylyq anyqtaldy», - deıdi ákimshilik polıtsııa basqarmasynyń bastyǵy Serik Áljanov.