Petropavlda kólik jóndeý ortalyǵynda jarylys bolyp, 9 adam jaraqattandy

PETROPAVL. QazAqparat – Petropavlda tehnıkalyq qyzmet kórsetý ortalyǵynda kóliktiń gaz qondyrǵysy jarylyp, 9 adam zardap shekti, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, oqys oqıǵa búgin Petropavldaǵy Gashek kóshesinde ornalasqan tehnıkalyq qyzmet kórsetý ortalyqtarynyń birinde saǵat 16:00 shamasynda bolǵan.

Belgili bolǵany, ortalyqta turǵan avtokólikterdiń birindegi gaz qurylǵysy jarylǵan. Ortalyq ǵımaraty qulap, arty órtke ulasqan. Jalyn 100 sharshy metr aýmaqqa jaıyldy.

Oqıǵa ornynda jedel járdem qyzmeti túrli deńgeıde jaraqat alǵan 9 adamǵa alǵashqy medıtsınalyq kómek kórsetti. Ázirge jaraqattanǵandar týraly naqty aqparat joq. Zardap shekkendermen jáne olardyń týystarymen SQO TJD psıhologteri jumys istedi.

Órt saǵat 16:53-te tolyq sóndirildi. Oqıǵa ornynda órt sóndirý qyzmetiniń 10 tehnıkasy men 43 mamany jumys istedi. Qaza tapqandar joq. Kelgen shyǵyn mólsheri men órttiń sebebi naqtylanady.