Petropavlda kólik qaqqan 86 jastaǵy keıýana oqıǵa ornynda kóz jumdy

Petropavlda jol-kólik oqıǵasy barysynda 86 jastaǵy áıel mert boldy. Ol kósheni joldyń ruqsat etilmegen jerinen kesip ótpek bolǵan, dep habarlaıdy QazAqparat tilshisi.

Jol-kólik oqıǵasynyń beınejazbasy áleýmettik jelide tarady.

Kýágerlerdiń aıtýynsha, júrginshi avtokóliktiń aldynan atyp shyǵyp, júrgizýshisi kólikti tejep úlgermegen.

Bul oqıǵa jaıynda Soltústik Qazaqstan oblystyq polıtsııasy baspasóz qyzmeti túsinik berdi.

14 qyrkúıek kúni saǵat 14:48 shamasynda Petropavl qalasynyń 60 jastaǵy turǵyny Internatsıonalnaıa kóshesinde Mitsubishi Montero Sport avtokóligin basqaryp kele jatyp, aldyn ala boljam boıynsha joldyń ruqsat etilmegen jerinen ótpek bolǵan jaıaý júrginshini qaǵyp ketken.

Jol-kólik oqıǵasy saldarynan 86 jastaǵy áıel oqıǵa ornynda kóz jumdy.

«Qazirgi ýaqytta Petropavl qalasy polıtsııa basqarmasynyń qyzmetkerleri qajetti saraptamalar taǵaıyndaý jáne túpkilikti protsestik sheshim qabyldaý úshin materıal jınap jatyr. Anyqtaý jumystary júrgiziledi», - delingen baspasóz habarlamasynda.

Eske sala keteıik, biz buǵan deıin SQO ortalyǵy Petropavlda eki jyl buryn jóndelgen kópir qaıta qırap jatqanyn habarlaǵan edik.

Petropavl men Jumysshy kentin qosatyn avtomobıl kópirin jóndeý qajet.

Eki jyl buryn ortasha jóndeýden ótken nysanda qaıtadan jaryqtar paıda bolyp, asfalti oıylyp qalǵan.