Petropavlda qoǵamdyq tamaqtaný salasynda mamandar jetispeıdi
Soltústik Qazaqstan oblysynyń kásipkerler palatasynda budan bylaı jumyspen qamtý ortalyǵynyń mamandary aptasyna eki ret jumys istemek.
Olar bıznes sýbektilerine memlekettik baǵdarlamalar jaıynda aıtyp beredi.
«Bul óte mańyzdy shara, óıtkeni jumyspen qamtý baǵdarlamalaryn iske asyrýda jumys berýshilerdiń belsendi qatysýy qajet. Kadrlarǵa degen qajettilik árdaıym bar, biraq kásipkerler kóbine bul máselemen bizge kele qoımaıdy. Kásipkerler palatasy – bul kásipkerler túrli máseleler boıynsha júginetin organnyń bir túri bolǵandyqtan, bizdiń osy alańda jumys isteýimiz bıznes úshin óte yńǵaıly. Mysaly, kásipker óz máseleleri boıynsha kelip, bıznesti qoldaý baǵdarlamalary boıynsha keńes alady», - deıdi Petropavl qalasynyń halyqty jumyspen qamtý ortalyǵynyń dırektory Serikjan Isenov.
Jumyspen qamtý ortalyǵy jumyssyz azamattardy jumysqa ornalastyrý boıynsha birneshe baǵdarlamany iske asyrady, oǵan qatysý kásipkerlerge belgili bir jeńildikter alýǵa múmkindik beredi.
Mysaly, «kúmis jas» baǵdarlamasy zeınet jasyna deıingi adamdardy jumysqa ornalastyrýǵa baǵyttalǵan.
Azamattardyń osy sanatyn jumysqa qabyldaý kezinde Memleket 12 aı ishinde jalaqy boıynsha bıznes shyǵystarynyń bir bóligin sýbsıdııalaıdy.
«Biz kadrlarǵa qysqa-uzaq merzimdi qajettilikti anyqtaý úshin jıi saýalnama júrgizemiz, ıaǵnı bizde bos jumys oryndarynyń pýly, halyqty jumyspen qamtý ortalyǵyna usynatyn qajettiliktiń boljamy bar. Al ortalyq óz kezeginde bizdiń derekterimizge súıene otyryp, naryqta suranysqa ıe mamandyqtar boıynsha jumyssyzdardy oqytady», - deıdi SQO Kásipkerler palatasynyń dırektory Tımýr Bekeev.
«SQO restoratorlar men qonaqúıler qaýymdastyǵy» QB atqarýshy dırektory Andreı Frolovtyń aıtýynsha, qoǵamdyq tamaqtaný salasyndaǵy kadr tapshylyǵy máselesin sheshýde jumyspen qamtý ortalyǵynyń kómegi bar.
«Búgingi tańda bizdiń salada 80-ge jýyq mamanǵa suranys bar. Bilikti aspazdar, naýbaıshylar, kondıterlik aspazdar men olardyń kómekshileri jetispeıdi. Qazir qala boıynsha ortasha jalaqy - 150-170 myń teńge. Aıyna 15 kún jumys isteıtinin eskersek, bul óte jaqsy jalaqy. Bul máseleni sheshý úshin biz qalalyq halyqty jumyspen qamtý ortalyǵymen belsendi jumys isteımiz, SQO Kásipkerler palatasynyń kómegimen jyl saıyn jumyssyz azamattardy oqytamyz, keıin olardy odan ári jumysqa ornalastyrýmen tájirıbeden ótýge alamyz. Bıyl biz 60 maman daıyndadyq, olar qazirgi ýaqytta Petropavldyń dámhanalary men meıramhanalarynda tájirıbeden ótip jatyr», - deıdi Andreı Frolov.