Petropavlda qoǵamdyq kólikte jeńildikpen júretinder qatary artty
Petropavl qalalyq ákimdigi baspasóz qyzmetiniń málimetinshe, Petropavlda mundaı jeńildik burynnan bar, biraq ony tek 7 men 15 jastaǵy mektep oqýshylary qoldanyp keldi. Oblys ortalyǵynda bul jastaǵy balalardyń sany 22 myńnan asady. Endi olardyń qataryna 15 pen 18 jastaǵy 3 myńnan astam bala qosylyp otyr. «Qalaishilik avtobýstarda 50 % jeńildikpen júrý úshin balanyń ózimen birge jasyn rastaıtyn qujaty bolýy tıis. Nemese jol kartasyn satyp alady. Nátıjesinde jolaqy úshin qolma-qol aqsha tólese – 65 teńge beredi, al eger jol kartasymen esep aıyryssa, onda jolaqysy 40 teńge bolmaq», - deıdi Petropavl ákimdiginiń baspasóz hatshysy Elmıra Sádýaqasova. Petropavlda budan basqa 12 sanatqa jatatyn azamattar qalalyq qoǵamdyq kólikte tegin qatynaıdy. Olar: 1-2 top múgedektigi bar adamdar, 16 jasqa deıingi múmkindigi shekteýli balalar, barlyq toptaǵy 16 jastan 18 jasqa deıingi múgedektigi bar balalar, 18 jasqa deıingi múmkindigi shekteýli balany tárbıelep otyrǵan zańdy ókili, UOS ardagerleri jáne olarǵa teńestirilgender, basqa memleketter aýmaǵynda urys qımyldarynyń ardagerleri, «Altyn alqa», «Kúmis alqa» ıegerleri, buǵan deıin «Batyr ana» atanǵan kópbalaly analar, kámelet jasyna tolmaǵan 4 jáne odan kóp balasy bar otbasylardyń bir zańdy ókili, sonyń ishinde kolledjde jáne ýnıversıtette kúndizgi bólimde oqıtyn 23 jasqa deıingi stýdentter, saıası qýǵyn-súrgin qurbandary, az qamtylǵan otbasylardyń zańdy bir ókili, kóp balaly otbasylardyń, az qamtylǵan otbasylardyń mektep jasyndaǵy balalary.
«Petropavlda qoǵamdyq kólikte tegin júrýge quqy bar 9,5 myńnan astam adam bar. Biraq solardyń tek 4,5 myńy ǵana ótinish berip, jol kartasyn aldy», - deıdi Elmıra Sádýaqasova.