Petropavlda kezekte turǵan 128 otbasy baspanaly boldy
Búgin Petropavlda 128 otbasy qonys toıyn toılap jatyr. Jaǵymdy jańalyqpen Soltústik Qazaqstan oblysynyń ákimi Qumar Aqsaqalov áleýmettik jelidegi óz paraqshasynda bólisti.
«Jyl saıyn turǵyn úı salýǵa bólinetin qarjy ósip keledi. 2020 jyly bul salaǵa 17 mlrd teńge bólinse, bıyl 28 mlrd teńgege jetti. Búginde Petropavlda kóppáterli 46 úı salynyp jatyr. Onyń 18-i kommertsııalyq úıler. Jyl sońyna deıin 28 úıdi paıdalanýǵa beremiz. Nátıjesinde 3,5 myń
páter salynady. 12 myń soltústikqazaqstandyq qonys toıyn toılaıdy», - dep jazdy Qumar Aqsaqalov.
Óńir basshysynyń aıtýynsha, Petropavlda jalǵa beriletin turǵyn úıler de salynyp jatyr.
Búgin kezekte turǵan azamattar «Bereke» shaǵyn aýdanynda qonys toıyn toılaýda. Kóp balaly otbasylar, jetimder, múgedekter, ardagerler jáne halyqtyń áleýmettik osal toptaryna kópqabatty úıden 128 páter berildi. ⠀
«Jalpy, «Bereke» shaǵyn aýdany qarqyndy damyp keledi. Biz 6 úı salyp jatyrmyz, onyń úsheýi jyl sońyna deıin paıdalanýǵa beriledi. Emhananyń qurylysy aıaqtalady, saıabaqtyń aýmaǵy keńeıedi, jańa mektep ashyldy. Osy yqsham aýdanda 217 turaqty jumys orny ashylatyn maıly daqyldar óńdeıtin zaýyttyń qurylysy bastaldy. CLAAS aýylsharýashylyq tehnıkasyn shyǵaratyn zaýyttyń qurylysy aıaqtalýǵa jaqyn, al qazir kompanııa jumysshylar izdeýde. Jańa óndiristerdiń arqasynda shaǵyn aýdan turǵyndary óz úıiniń janynan jumys tabýǵa múmkindik aldy», - deıdi Qumar Aqsaqalov.