Petropavlda Kásipodaqtar kúni qarsańynda alleıaǵa shyrshalar otyrǵyzyldy
10 qazan – Kásipodaqtar kúni. Bul mereke bıyl úshinshi jyl qatarynan toılanbaq. Bıyl da mereke qarsańynda jáne el Táýelsizdiginiń 30 jyldyǵyna oraı Petropavldaǵy kásipodaqtar qozǵalysy ardagerleriniń alleıasyna 30 túp sibir shyrshasy otyrǵyzyldy. Alleıa QR Tuńǵysh Prezıdenti saıabaǵynda ornalasqan. Igi sharaǵa kásipodaq músheleri, ardagerler, jergilikti bılik ókilderi qatysty. Úsh jylda munda 100-ge jýyq aǵash paıda boldy.
Keıin Petropavldaǵy Jastar saraıynda kásipodaqtardyń bastaýysh uıymdarynyń qatysýymen forým ótti. Merekege oraı ardagerler, odaqtyń belsendi músheleri – túrli sala ókilderi marapattaldy. Táýelsizdik mereıtoıyna oraı QR kásipodaqtar federatsııasy 2021 jyldy bastaýysh kásipodaq uıymdarynyń jyly dep jarııalady. Osyǵan oraı arnaıy baıqaý uıymdastyrylyp, onyń jeńimpazdary búgin marapatqa ıe boldy.
«Bizdiń múshelerimizdiń barlyǵy – stanoktyń basynda turǵan, taqtanyń aldynda balalarǵa sabaq túsindirgen, emhanada syrqattardy qabyldaǵan taǵy sol sııaqty eńbek adamdary. Bizdiń maqsatymyz – ómir súrý deńgeıin jyldan jylǵa jaqsartý, jumysshylardyń laıyqty eńbekaqy alyp, qorǵalýy. Óńirde 65 myń múshemiz bar. Kásipodaqtar - respýblıkadaǵy eń úlken qoǵamdyq uıym. 60 myń bastaýysh uıymy bolsa, sonyń 1200-i bizdiń oblysta», - deıdi SQO kásipodaq ortalyǵynyń tóraǵasy Erik Nuraqaev.