Petropavlda kásipkerlerge qamqorlyq jasaǵany úshin para alǵan polıtsııa bastyǵy 7 jylǵa sottaldy

PETROPAVL. QazAqparat – Petropavlda polıtsııanyń ekinshi bóliminiń jergilikti polıtsııa qyzmeti bólimshesiniń bastyǵy Rýslan Shakırov jasaǵan sybaılas jemqorlyq qylmysy úshin 7 jylǵa bas bostandyǵynan aıyryldy, dep habarlaıdy QazAqparat tilshisi.

Soltústik Qazaqstan oblysy sybaılas jemqorlyqqa qarsy qyzmettiń málimetinshe, Petropavl polıtsııasy ekinshi bóliminiń jergilikti polıtsııa qyzmeti bólimshesiniń bastyǵy Rýslan Shakırov qylmystyq-atqarý júıesiniń ortasha qaýipsiz mekemesinde 7 jyl jazasyn óteıdi, «polıtsııa maıory» arnaýly ataǵynan aıyrylyp, memlekettik qyzmette qyzmet atqarý quqyǵynan ómir boıyna qol úzdi.

Tergeý barysynda jergilikti polıtsııa qyzmeti bólimshesi bastyǵynyń ákimshilik zańnamany buzýshylardan júıeli negizde aqsha jınaǵany dáleldendi.

QR Sybaılas jemqorlyqqa qarsy is-qımyl agenttigi SQO boıynsha departamenti basshysynyń birinshi orynbasary Aıdos Júnisovtyń aıtýynsha, Rýslan Shakırov 2021 jylǵy qańtar men 2022 jylǵy naýryz aralyǵynda tıisti qujatsyz jarnama ornalastyrǵan jeke kásipkerdi ákimshilik jaýapkershilikke tartpaǵany úshin jáne jalpy qamqorlyǵy úshin para retinde 50 000 teńge mólsherinde aqshalaı qarajat alǵan.

Sondaı-aq eks-polıtseı zańsyz saýda faktisine kóz juma qaraǵany úshin kásipkerden para retinde 193 000 teńge kóleminde aqsha alǵan.

Budan bólek, aqsha tólep, tártip saqshysynyń qamqorynda bolǵan eki adam – M.Nasımov jáne J.Sadýov zańsyz kásipkerlik qyzmetpen aınalysqany úshin sottaldy.

Olar aktsızdik nemese esepke alý-baqylaý markalarymen tańbalanatyn ónimderdi zańsyz saqtap, satyp kelgen.

Qyzmetkeriniń sybaılas jemqorlyq qylmysy úshin birqatar joǵary turǵan basshy tártiptik jaýapkershilikke tartyldy.