Petropavlda kásipker qaıyńdy ormandy zańsyz otap, 41 mln teńge shyǵyn keltirdi

PETROPAVL. QazAqparat – Petropavlǵa kireberistegi qaıyńdy ormandy otaǵan kásipkerge qatysty qylmystyq is qozǵaldy. Keltirilgen shyǵyn – 41 mln teńge, dep habarlaıdy QazAqparat tilshisi.

Petropavl irgesindegi «Leshoz» aýdanynda qaıyńdy ormannyń otalýy kópshiliktiń narazylyǵyn týdyrǵan edi. Meniń satyp alǵan jerim dep, qujattaryn alǵa tarqan kásipker ol ýchaskedegi jaıqalǵan aǵashty kesip tastaǵan. Soltústik Qazaqstan oblysynyń ákimi Qumar Aqsaqalov bul jaǵdaıǵa qatysty pikir bildirdi.

«Soraqy jaǵdaı, bul jer ýchaskesine qatysty másele 16 jyldan beri bar. 2006 jyly bul jer orman qorynan shyǵarylǵan. 2007 jyly kásipker Baqtııar Abdýllaev jol boıynda qyzmet kórsetý nysanyn salý úshin Petropavl qalasy ákimdigimen saýda-sattyq kelisimge otyrǵan. Biraq, eshqandaı jumys atqarylmaǵan. Sondyqtan, qala ákimdigi birneshe ret jer ýchaskesin memleket menshigine qaıtarmaq boldy. Bas josparǵa sáıkes jer ýchaskesi úı-jaı salý aımaǵynda ornalasqan jáne onda qaıyń shoqtary kórsetilgen. Jer ýchaskesi ıesiniń qaıyń ormanyn otaýǵa esh quqyǵy bolmaǵan. Óıtkeni, kásipker Petropavl qalalyq turǵyn úı-kommýnaldyq sharýashylyǵy bóliminen zańdy talapqa saı tıisti ruqsat almaǵan», - dedi Qumar Aqsaqalov.

Qaıyń aǵashtaryn kesýge qatysty Petropavl qalalyq polıtsııasy qylmystyq is qozǵady. Qazir tergeý amaldary júrgizilip jatyr. Barlyq is-áreket tekseriledi. Aldyn ala boljam boıynsha memleketke 41 mln teńge shyǵyn keltirildi.

«Byltyr osyǵan uqsas oqıǵa Qyzyljar aýdanynda tirkeldi. Keıin aýdandyq ákimdik jer ýchaskesin memleket menshigine qaıtardy, biraq keltirilgen shyǵyn áli kúnge deıin ótelgen joq», - dedi oblys ákimi.

Qyzyljar aýdanynda zańsyz otalǵan aǵash boıynsha is sotqa jetti.

«Biz kásipkerge aıyppul saldyq, isti sotqa berdik. Biraq, sot qyrkúıek aıynyń basynda ony qaıtaryp jiberdi, sondyqtan qazir qaıta qujattardy daıyndap jatyrmyz. Aýyldyq okrýg ákimdigi shyǵyn mólsherin durys eseptemegen. Keltirilgen shyǵyn – 12 mln teńge», - deıdi Qyzyljar aýdanynyń ákimi Janat Sádýaqasov.

2018 jyldan bastap osy kúnge deıin sot arqyly Petropavl qalasy boıynsha 44 ýchaske qaıtarylǵan. Jalpy aýmaǵy 29 ga-dan asady.

SQO ákimi mundaı jaǵdaılar bolashaqta qaıtalanbaýy úshin jasyl jelegi bar barlyq jer ýchaskelerine revızııa júrgizýge tapsyrma berdi.