Petropavlda qarýlanǵan oqýshydan zardap shekkender jansaqtaý bóliminde jatyr
Soltústik Qazaqstan oblystyq densaýlyq saqtaý basqarmasynyń málimetinshe, búgin tańǵy saǵat 8.26 mınýt ketkende oblystyq kópbeıindi balalar aýrýhanasynyń qabyldaý bólmesine jedel járdem qyzmeti úsh balany jetkizdi. Jasóspirimderde túrli jaraqat bolǵan.
«Zardap shekken balalardyń bireýine alǵan jaraqattaryna baılanysty qabyldaý bólmesinde kómek kórsetilip, ambýlatorlyq em alý úshin úıine jiberildi.
Qalǵan eki balany jedel túrde aýrýhanaǵa jatqyzýǵa týra keldi. Patsıentter dereý ota zalyna jetkizilip, narkoz arqyly alǵan jaraqattary óńdeldi. Qajetti dıagnostıkalyq sharalar jasaldy, salalyq dárigerlerdiń keńesi alyndy. Qazirgi ýaqytta eki balanyń da jaǵdaıy qalypqa keldi. Syrqattar jansaqtaý bólimshesinde jatyr», - delingen habarlamada.
Úıine jiberilgen bala oqıǵanyń qalaı bolǵanyn aıtyp berdi.
«Dárethananyń esigin ashqan edim, maǵan 9-synyp oqýshysy qolyndaǵy baltasymen tap berdi. Basymnan jáne moınymnan urdy. Onyń betinde maska, qolynda pyshaq pen balta boldy. Sondaı-aq, sol kezde dálizde bolǵan 9-synyptyń oqýshysy er bala men 10-synypta oqıtyn qyzǵa shabýyl jasady. Barlyǵy óte tez boldy. Aýyrǵan joq, ne bolǵanyn túsinbeı qaldym», - deıdi zardap shekken oqýshy.
Jaraqat alǵan balanyń anasynyń aıtýynsha, ulynyń basy aınala bergendikten, aýrýhanada basyn teksertken.
«Qan qysymy kóterilip, júregi aınydy, balamda tahıkardııa paıda boldy. Shabýyl jasaǵan bala qalaı mektepke pyshaq jáne baltany alyp kirgen. Kireberiste kúzet bolýy tıis qoı. Balalardy tekserýi kerek qoı. Sómkelerin qarasyn. Eger bala aýyratyn bolsa, psıhıatrııalyq esepte tursa, úıde otyrsyn», - deıdi zardap shekken oqýshynyń anasy Vera Gorbachenko.
Buǵan deıin Petropavldaǵy №4 orta mektepte 9-synyp oqýshysy qarýlanyp kelip, 3 oqýshyny jaraqattaǵany týraly aıtqan edik.
Sondaı-aq balalardy jaraqattaǵan oqýshy psıhıatrııalyq esepte turatyny habarlandy.
Al búgin QR Oqý-aǵartý mınıstrligi barlyq mektepterde qaýipsizdik boıynsha tekserý júrgiziletinin habarlady.