Petropavlda qamys órtenip, 4 turǵyn úı túgi qalmaı janyp ketti

PETROPAVL. QazAqparat – Petropavldyń mańynda qamys janyp jatyr. Lapyldaǵan ot kóshege kirip, 4 turǵyn úı janyp ketti. Oqıǵa ornynda órt sóndirýshiler jumys istep jatyr, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, búgin saǵat 18.57 mınýt ketkende Petropavldaǵy 5-Sennaıa kóshesindegi ashyq alańda qýraǵan qamys janyp jatqany jóninde habar túsken.

Jeldiń ekpini sekýndyna 23 metrge deıin jetkendikten, órtke 4-shi qaýipsizdik deńgeıi berildi.

Oqıǵa ornynan 40 adam, sonyń ishinde 9 bala qaýipsiz jerge shyǵaryldy. Ázirge qamystyń neden tutanǵany belgisiz.

«Qatty jeldiń saldarynan laýlaǵan ot jaqyn mańdaǵy úılerge jetip, 4 baspana janyp ketti. Turǵyndardy qaýipsiz jerge shyǵaryp úlgerdi. Zardap shekkender men qaza tapqandar joq. Órt ázirge aýyzdyqtalǵan joq», - dedi departamenttiń baspasóz qyzmetindegiler.

Órtpen kúreske SQO TJD 13 tehnıkasy men jeke quramnan 73 adam jumyldyryldy.

Sondaı-aq temirjoldan 4 qyzmetker men bir tehnıka, polıtsııa departamentinen 50 qyzmetker men 9 tehnıka, jergilikti atqarýshy bılikten 10 adam jáne 5 tehnıka órtti sóndirip jatyr.

Áleýmettik jelide turǵyndar órtti túsirip, bólisip jatyr.

Petropavl qalalyq ákimdiginiń málimetinshe, № 25 orta mektepte evakýatsııalyq pýnkt ashylǵan. 55-10-10, 52-27-25 telefon nómirleri boıynsha jedel jeli jumys isteıdi.