Petropavlda qalyń qar jaýyp, kóshe tazalaýǵa 70 tehnıka shyǵaryldy
Soltústik Qazaqstan oblysynda keshe qalyń qar jaýyp, arty kóktaıǵaqqa ulasty. Petropavl qalasy ákiminiń aıtýynsha, arnaıy tehnıka kóshelerdi qardan tazartý jumystaryna qaýyrt kiristi.
«Kesheden beri Petropavl qalasy boıynsha 7 mm qar jaýdy. Kommýnaldyq qyzmetter birden iske kirisip, kóshelerdi qardan tazalaý jumystaryn júrgizip jatyr. Búgin túnde mamandar 130 shaqyrym magıstraldi joldy aq ulpadan tazartty. Sharýaǵa 23 tehnıka jumyldyryldy. Taǵy 19 arnaıy tehnıka jaıaý júrginshiler jolyn tazartyp, 3 mashına kóktaıǵaqqa qarsy qum-tuz qospasyn tóseýmen aınalysty. Odan bólek, 17 tehnıka men 30 adam qar shyǵarý jumystaryna jumyldyryldy. Sharýa búgin keshke jalǵasyn taýyp, magıstraldi joldardyń barlyq ýchaskeleri aq ulpadan tazartylady», - dep jazdy Rýslan Ańbaev áleýmettik jelidegi paraqshasynda.
Shahar basshysynyń aıtýynsha, bıylǵy qysta kóshelerdi qardan tazartý jumystaryna barlyǵy 154 tehnıka jumyldyrylmaq. Aldymen magıstraldi joldar tazartylady. Keıin tehnıka qosalqy kóshelerge aýysyp, jumys isteıdi. Sondaı-aq, kóktaıǵaqty boldyrmas úshin joldarǵa qum-tuz qospasy tóseledi. Osy maqsatqa 2 myń tekshe metr qospa ázirlengen. Ákim qala turǵyndary men qonaqtaryn kóshede abaı bolýǵa shaqyrdy.
«Qurmetti kólik júrgizýshileri men jaıaý júrginshiler, bir kúnniń ishinde ǵana qala boıynsha 14 jol-kólik oqıǵasy tirkeldi. Abyroı bolǵanda zardap shekkender joq. Qazir aýa raıy buzylyp tur, dalada kóktaıǵaq. Sondyqtan, barshańyzdan jolda abaı bolýdy suraımyn», - dedi Rýslan Ańbaev.
Vıdeodan alyn ǵ an kadr