Petropavlda qala balansynda turǵan 1,5 myń páter zańsyz jalǵa berilgen

PETROPAVL. QazAqparat – Soltústik Qazaqstan oblysynyń sybaılas jemqorlyqqa qarsy qyzmeti Petropavl ákimdiginiń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimine jemqorlyq táýekelderine syrtqy taldaý jasap, birqatar zańbuzshylyqtardy anyqtady, dep habarlaıdy QazAqparat tilshisi.

QR Sybaılas jemqorlyqqa qarsy is-qımyl agenttiginiń SQO boıynsha departamentiniń basshysy Sergeı Perov óńirlik kommýnıkatsııalar qyzmetinde ótken brıfıngke qatysyp, atqarylǵan jumysty qorytyndylady.

Sybaılas jemqorlyqqa qarsy qyzmet Petropavl qalalyq ákimdiginiń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimine jemqorlyq táýekelderine syrtqy taldaý jasaǵan.

Nátıjesinde turǵyn úı salasynda sybaılas jemqorlyq táýekelderi anyqtalǵan.

«Tekserý barysynda biz qalalyq ákimdiktiń balansynda turǵan, biraq zańsyz jalǵa berilgen 1,5 myń páterdi anyqtadyq. Kommýnaldyq baspanany bólýmen aınalysatyn qalalyq bólimde 1,5 myń páterge qatysty qujattar bolmaǵan. ıAǵnı, olar ıesiz qalǵan. Qazirgi basshylar bul páterler týraly bilmegen. Oǵan mamandardyń turaqtamaýy, basshylardyń jıi aýysýy sebep, ári tıisti jumys atqarylmaǵan. Biz polıtsııa qyzmetkerlerimen birge mekenjaılar boıynsha júrip, ol páterlerde kimderdiń turyp jatqanyn anyqtadyq. Іshinara júrip ótken bul baspanalarda eshqandaı qujatsyz, kelisimshartsyz bógde adamdar turǵan», - deıdi Sergeı Perov.

Vedomstvo basshysynyń aıtýynsha, qazirgi ýaqytta balanstaǵy barlyq páterler tekseriledi, jalǵa berý aqysyn tólemegender bolsa, olardyń qaryzy anyqtalady.

Zańsyz turyp jatqandar shyǵarylady. Al bosaǵan baspana kezekte turǵandarǵa úlestirilmek.

«Jalpy, turǵyn úı komıssııasy muqtajdar arasynda turǵyn úıdi bólý barysynda zań talaptaryn oryndamaǵan, kezektilik tártibin buzǵan. Jetim balalar sanaty boıynsha baspanaǵa muqtaj azamattardy sebepsiz tizimnen alyp tastaǵan. Osyndaı 1360 derek anyqtalǵan. Turǵyn úı alýǵa kezekte turmaǵan adamdarǵa páter berýdiń 70 faktisi jarııa boldy», - deıdi Sergeı Perov.

Sybaılas jemqorlyqqa qarsy qyzmettiń aralasýynan keıin jalǵa beriletin páterler zańdy túrde bóline bastady.

Nátıjesinde birinshi kezekte halyqtyń áleýmettik turǵydan osal toptary – kóp balaly ana – altyn alqa ıegerleri, jetim balalar, kóp balaly otbasylar baspanaly bolady.

«Departamenttiń kómektesýimen eki otbasy jańa páterge kirip, qonys toıyn toılady. Olar 15 jyldan artyq baspana kezeginde turǵan. Bul otbasylarǵa eki jyl buryn páter berilýi kerek edi», - deıdi Sergeı Perov.