Petropavlda ǵasyrdan astam tarıhy bar botanıkalyq baq kúrdeli jóndeýden ótti
Petropavldaǵy botanıkalyq baq – óńirdegi negizgi týrıstik nysandardyń biri. Qyzyljar óńiriniń maqtanyshy. Oranjereıany tamashalaýǵa kelgen eresekter de, balalar da ózine qyzyqty maǵlumat ala alady. Jańa keıipke engen botanıkalyq baq endi týrıstik ortalyqqa aınalmaq.
«Kúrdeli jóndeý jumysyna astanalyq mamandar tartyldy. Kireberiske qalyqtap turǵan baqshanyń áserin berý úshin aına qoıdyq. Toǵan, sýburqaq, qysqy baq, kireberis arka jónge keltirildi. Bizdiń kompanııa úsh jyl servıstik qyzmet kórsetedi. Kóńilden shyqpaı jatsa, olqylyqtar tabylsa, sózsiz jóndeımiz», - deıdi elordalyq qurylys kompanııasynyń ókili Asylbek Baǵanov.
Jóndeý jumystarynyń jalpy bıýdjeti - 200 mln teńge bolsa, tek abattandyrýǵa ǵana 90 mln teńge jumsaldy.
«Kúrdeli jóndeýden keıin kópshiliktiń súıikti orny – botanıkalyq baq ashyldy. Biregeı oranjereıaǵa qala qonaqtary ǵana emes, turǵyndar da jıi demalýǵa keledi. Balalardy qorǵaý kúnine oraı arnaıy ashyp otyrmyz. Osydan birer jyl buryn oranjereıa jabylady degen qaýeset tarady. Men bul demalys orny, kerisinshe, kórkeıe túsedi dep aıttym. Onyń biregeıligi – bıyl qurylǵanyna 108 jyl tolyp otyr. Kúrdeli jóndeýge deıin oranjereıa aýmaǵy zamanǵa saı kelmedi, eskirgen boldy. Qazir batpaqtyń ornyna sarqyrama paıda boldy, túrli shaǵyn sáýlet nysandary qoıyldy. Endi osy baqqa ákeletin joldy jónge keltirý qajet», - dedi oblys ákimi.
Botanıkalyq baq endi keshke de jumys isteıdi. Mamandardyń aıtýynsha, ár ósimdik jaryqtandyryldy, nátıjesinde keshki baq ǵajaıyp kúıge enedi.
Jalpy bul oranjereıa – elimizdegi eń kóne baqtardyń biri. Munda tropıkalyq aǵashtar, palma, lımon, agava, orhıdeıa sııaqty ekzotıkalyq ósimdikter ósedi.