Petropavlda er adam kóshede atys qarýymen júrgen

PETROPAVL. QazAqparat – Petropavlda polıtseıler beınebaqylaý kameralary arqyly karabınmen kóshe ortasynda júrgen er adamdy baıqap, ustady, dep habarlaıdy QazAqparat tilshisi.

Soltústik Qazaqstan oblysy Polıtsııa departamenti baspasóz qyzmetiniń málimetinshe, polıtseıler beınebaqylaý kameralary arqyly qoǵamdyq oryndarǵa monıtorıng júrgizý barysynda Naberejnaıa kóshesiniń boıynda atys qarýyna uqsas zatpen júrgen er adamdy baıqaǵan. Aqparat jedel túrde barlyq narıadtarǵa joldanyp, oqıǵa ornyna avtopatrýl men ýchaskelik polıtsııa ınspektorlary jiberildi. Er adam ustaldy. Shynynda jigittiń qolynda kıimge jartylaı oralǵan karabın bolǵan. Sondaı-aq onyń mas ekendigi anyqtaldy.

Aıtýynsha, ol qarýdy bir aı buryn saıajaı qoǵamdastyǵynyń birinde saıajaıdaǵy úıdi demontajdaý kezinde taýyp alǵan. Qarý edenniń astynda mataǵa oralǵan kúıde jatqan. Er adam ony úıine ákelip, tot basqan jerlerin tazartqan.

Sondaı-aq onyń sózinshe, sol kúni qarýdy polıtsııaǵa tapsyrý úshin ákele jatqan. Alaıda jaqyn mańdaǵy polıtsııa bólimine jete almady, qala turǵyndary men beınebaqylaý kameralarynyń arqasynda polıtseıler oǵan ózderi shuǵyl jetken. Er adamǵa qatysty QR ÁQtK 440-baby «Alkogoldik ishimdikti ishý nemese qoǵamdyq oryndarǵa masań kúıde kelý» boıynsha ákimshilik hattama toltyryldy. Qazirgi tańda qarýdy qaıdan alǵany anyqtalyp jatyr.

Atalǵan fakti QR QK «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» baby boıynsha Sotqa deıingi tergep-tekserýlerdiń biryńǵaı tizilimine engizildi. Alynǵan qarý saraptamaǵa jiberildi.

Tárkilengen qarý KO-44 karabıni. Onyń bekitkish tetigi joq jáne serııalyq nómiri qaıta soǵylǵan. Atalǵan fakti boıynsha túpkilikti protsessýaldyq sheshim saraptama nátıjelerinen keıin qabyldanady.