Petropavlda er adam «balamnyń, áıelimniń emine» dep jurtty aldap, 7 jyl aqsha jınap kelgen

<p>PETROPAVL. KAZINFORM &ndash; Petropavlda jurtty aldap, birneshe jyl aqsha jınaǵan er adam 5 jylǵa sottaldy.</p>

Soltústik Qazaqstan oblysy polıtsııa departamenti baspasóz qyzmetiniń málimetinshe, 37 jastaǵy Petropavl turǵyny áıelin nemese balalaryn emdeıtinin aıtyp, 2016 jyldan beri tanystarynan túrli somada «qaryzǵa» dep aqsha alyp kelgen. Tipti qolhat jazyp, «ústinen aqsha qosyp qaıtaramyn» dep aıtqan.

Alaıda, sózinde turmaǵan. Jınalǵan aqshany óziniń qajetine jaratqan. Alaıaqtyqtyń qurbandary onyń qaıta-qaıta aıtqan ýádelerine senip, ábden shydamdary taýsylǵan soń, tek 2023 jyly ǵana polıtsııaǵa júgine bastaǵan.

Qylmysty tergeýmen aınalysqan petropavldyq polıtseıler osy iske qatysty 14 epızodty anyqtady. Alaıaq tanystaryna 270 myńnan 15 mln teńgege deıin shyǵyn keltirgen.

Tergeýshilerdiń muqııat júrgizgen jumysynyń nátıjesinde bul is QR Qylmystyq kodeksiniń 190-baby «Alaıaqtyq» boıynsha sotqa jiberildi. Petropavl qalalyq soty kúdiktini aıypty dep tanydy. Oǵan 5 jylǵa bas bostandyǵynan aıyrý túrindegi jaza taǵaıyndaldy. Sondaı-aq ol keltirgen shyǵyndy da óteıdi.

Sot úkimi zańdy kúshine enbedi.