Petropavlda Energetıkalyq qazandyq jabdyǵyn shyǵaratyn óndiris iske qosyldy

ASTANA. QazAqparat - Búgin eldiń Údemeli ındýstrııalyq-ınnovatsııalyq damý memlekettik baǵdarlamasyn iske asyrý boıynsha Úkimettiń esebimen tanysý barysynda QR Prezıdenti Nursultan Nazarbaev Petropavlda Energetıkalyq qazandyq jabdyǵyn shyǵaratyn óndiristi iske qosty.

Elordamen tikeleı baılanysqa shyqqan «Petropavl aýyr mashına jasaý zaýyty» ókiliniń aıtýynsha, jylyna 4 myń tonna energetıkalyq qazandyq jabdyqtary daıyn ónim bolyp shyǵarylatyn bolady. Jobany «Qazaqstan ınjınırıng» kompanııasy qarjylandyryp otyr.

«Osynyń arqasynda biz qazaqstandyq qamtý úlesin arttyryp, eksportqa jol ashamyz. Jańa keshen qazaqstandyq energetıkalyq kásiporyndardy tolyǵymen sapaly ónimmen qamtamasyz etýge qaýqarly. Qurmetti Nursultan Ábishuly! Óndiristi iske qosýǵa ruqsat etińiz», - dedi ol.

«Ruqsat beremin. Bizdiń energetıkalyq nysandarymyz úshin asa mańyzdy kásiporyn. Barlyqtaryńyzǵa sáttilik tileımin. Zaýyttyń iske qosylýymen quttyqtaımyn», - dedi N.Nazarbaev óz kezeginde.