Petropavlda elimizdegi qaǵaz óndirýshiler biliktiligin arttyryp jatyr
Soltústik Qazaqstan oblysy kásipkerler palatasy baspasóz qyzmetiniń málimetinshe, 2017 jyly «Radýga» JShS janynan «Profresýrs» ortalyǵy ashyldy. Bul – qaǵaz óndirisi boıynsha qysqamerzimdi oqytýdy júzege asyratyn eldegi jalǵyz oqý orny. Kásipkerler palatasynyń qoldaýymen ashylǵan ortalyq «Atameken» Ulttyq kásipkerler palatasynyń tiziliminde tur.
«Profresýrs» oqý ortalyǵy 7 jyl ishinde plastmassa quıýshylardy, avtomatty jeli operatorlaryn, dánekerleýshilerdi, mashınısterdi jáne basqa da suranysqa ıe mamandardy daıarlap keledi.
«Bıyl ortalyq suranysqa ıe eki jańa mamandyqty qosyp, biliktilik tizimin jańartty. Bul – qaǵaz ben karton óndirisiniń jáne orama qaǵaz, basqa da qaǵaz ónimderin shyǵarýdyń operatorlary. Qazirgi ýaqytta Qazaqstandaǵy osyndaı mamandardy daıarlaıtyn ortalyq tek Petropavlda ǵana bar ekenin atap ótken jón», - deıdi SQO kásipkerler palatasynyń sarapshysy Irına Toropova.
Kýrsqa Astana men Shymkentten qaǵaz óndirýshi 4 kompanııanyń ókilderi arnaıy keldi.
«Men ózim de oqımyn jáne 4 mamandy janyma erte keldim. Qyzmetkerlerimiz bilim alýǵa daıyn, óıtkeni elimizde mundaı qajetti bilimdi alý qıyn. Joǵarǵy oqý oryndarynda mundaı ádisti úıretpeıdi, ol úshin Reseıge barý kerek. Biz biliktiligi joǵary professorlardan bilim alatynymyzǵa qýanyshtymyz», - deıdi Astanadaǵy «Goida.kz» JShS dırektorynyń orynbasary Nurlan Zakarıanov.
Bir aı boıy kúnine 7 saǵat «Profresýrs» oqý ortalyǵynda tsellıýloza-qaǵaz óndirisiniń mamandarymen Oral memlekettik orman tehnıkalyq ýnıversıtetinen arnaıy shaqyrylǵan oqytýshylar aınalysady.
«Tsellıýloza-qaǵaz óndirisi, qaǵaz alý tehnologııasyna qatysty bilim berip jatyrmyz. Munda negizinen aǵashtyń morfologııalyq qurylymyn qarastyramyz, daıyn kesekterin mıkroskoppen kórsetip, ártúrli aǵash talshyqtarynyń negizgi anatomııalyq elementterimen tanysamyz. Men tsellıýlozany alaýan tásildermen óńdeýdiń tolyq tsıkli týraly aıtamyn», - deıdi Ekaterınbýrg qalasyndaǵy Oral memlekettik orman tehnıkalyq ýnıversıtetiniń professory Olesıa Výrasko.
Esterińizge sala keteıik, «Radýga» JShS Petropavlda qaǵaz buıymdar fabrıkasyn 2022 jyldyń qazan aıynda iske qosty. Qazirgi ýaqytta zaýyt sanıtarlyq-gıgıenalyq maqsattaǵy taýarlardy – maılyqtardy, qaǵaz súlgilerdi, dárethana qaǵazyn jáne A4 keńse qaǵazynyń eki túrin shyǵaryp, tolyq qýatta jumys isteıdi.
«Búginde qaǵaz buıymdar fabrıkasynda 60 adam eńbek etip jatyr. Bizge qyzmetkerlerdiń biliktiligin arttyrý, ınjenerlerdi, tseh bastyqtaryn, zamanaýı jabdyqta jumys isteı alatyn mamandardy daıarlaý mańyzdy. Áriptesterimizdiń bilmekke umtylǵanyn qalaımyz. Qazirgi kezde mektepti basqarýǵa alyp, keıin ony mektep-kolledjge aınaldyrdyq. Túlekterge júz paıyz jumysqa ornalasýǵa kepildik beremiz. Biz qaǵaz salasynyń mamandaryna memlekettik úlgidegi dıplomdar berýdi qolǵa alyp jatyrmyz. Osy maqsatqa jetý jolynda oqý ortalyǵy janynan qaǵaz óndirisi boıynsha mamandardy qysqa merzimdi daıarlaýdy bastadyq. Bul – kadrlardy kásibı daıarlaýdy uıymdastyrýdaǵy alǵashqy tájirıbemiz. Sala boıynsha seriktesterimizdi tartyp, jaqsy bilim beretin professorlardy shaqyrdyq», - deıdi «Radýga» JShS Bas dırektorynyń orynbasary Dáýren Katranov.
Buǵan deıin SQO-da qandaı mamandar suranysqa ıe ekenin jazǵan edik.