Petropavlda eki emhana jáne aýrýhananyń qurylysy júrip jatyr

PETROPAVL. QazAqparat – Petropavldaǵy jańa yqsham aýdandarda bir aýysymda 250 adamdy qabyldaıtyn eki emhana salynyp jatyr, dep habarlaıdy QazAqparat tilshisi.

Petropavlda qurylysy júrip jatqan eki emhananyń biri «Bereke» yqsham aýdanynda ornalasqan. 250 adamdyq emdeý mekemesi keler jyly paıdalanýǵa berilmekshi.

Dál osyndaı nysannyń qurylysy «Jas órken» yqsham aýdanynda da bastaldy.

Qazan aıynda jumys bastalyp, osy kúnge deıin 350 mln teńge ıgerildi. Jalpy jobanyń quny – 2 mlrd 300 mln teńge.

«Bıyl sáýir aıynan bastap naryqta qurylys materıaldarynyń baǵasy eki ese qymbattady. Ásirese, temirden jasalǵan kerek-jaraqtyń baǵasy sharyqtap tur. Máselen, tireýishtiń metri jobada 4200 teńge bolsa, qazir 8 myń 600 teńgeden satylyp jatyr. Sondyqtan qajetti qurylys materıaldaryn elimizdiń túkpir-túkpirinen tıimdi baǵamen jetkizip jatyrmyz. Máselen, kirpishti Nur-Sultan qalasynan ákelemiz», - deıdi merdiger kompanııanyń dırektory Andreı Kapýstın.

Qurylys alańynda 50-ge jýyq jumysshy, 10-nan astam tehnıka jumys istep jatyr.

Qurylysshylardyń aıtýynsha, ázirge aýa raıy qolaıly, materıaldar da ýaqytynda jetkizilip jatyr.

Jumysshylar da eńbekaqysyn ýaqytynda alyp keledi. Emhanany keler jyldyń kúzinde qoldanysqa bermek.

SQO qurylys basqarmasy baspasóz qyzmetiniń málimetinshe, sońǵy jyldary óńirde tek densaýlyq saqtaý salasynda ǵana 14 aýrýhana salynyp, 6 emhana paıdalanýǵa berildi.

Qazir oblys ortalyǵynda eki emhanadan bólek oblystyq aýrýhananyń qurylysy júrip jatyr.