Petropavlda eki kúnde 15 mln teńgeniń veıpteri tárkilendi
Soltústik Qazaqstan oblysy polıtsııa departamenti baspasóz qyzmetiniń málimetinshe, uıymdasqan qylmysqa qarsy kúres basqarmasynyń qyzmetkerleri Petropavldaǵy Internatsıonal kóshesindegi býtıkterdiń birinen tyıym salynǵan zattardyń saýdaǵa túskenin anyqtady. Tintý kezinde eki túrli 150 veıp tárkilendi. Tárkilenip alynǵan zattardyń jalpy somasy 2 mln 400 myń teńge.
Dál sol kúni jedel ýákilder Altynsarın kóshesinde 19 jastaǵy qala turǵyny jalǵa alǵan garajdan 197 veıp pen olarǵa arnalǵan suıyqtyq quıylǵan 542 qutyny anyqtap, tárkiledi. Tárkilengen zańsyz taýardyń jalpy somasy 7 mln teńgeni qurady. Jas jigit bul taýardy satýǵa zańmen tyıym salynǵanyn bile tura, saýdasyn júrgizgen, ol úshin Telegram messendjerin paıdalanǵan.
Budan bólek, Dobrovoltsev kóshesiniń boıynda basqarmanyń jedel ýákilderi Volkswagen avtokóliginiń 19 jastaǵy jolaýshysynan túrli markadaǵy 272 veıp pen olarǵa arnalǵan suıyqtyq quıylǵan 130 qutyny anyqtady. Tárkilengen taýardyń quny 6 mln 220 myń teńgege baǵalanyp otyr.
Jigittiń aıtýynsha, ol da zańmen bul taýarǵa tyıym salynǵanyn bilgen, soǵan qaramastan tanymal messendjerdegi kanaldy paıdalanyp, osy ónimderdi satyp kelgen.
Barlyq úsh fakti boıynsha sotqa deıingi is júrgizý bastaldy, tergeý júrip jatyr.
Mamandardyń aıtýynsha, suıyq qospalar túrindegi nıkotın densaýlyqqa, ásirese, jasóspirimder úshin óte qaýipti. Veıpti paıdalaný mıdyń, júrek-qan tamyr jumysyna keri áserin tıgizedi, allergııalyq reaktsııalardy qozdyrady.
Buǵan deıin SQO-da ekonomıkalyq tergep-tekserý departamenti mamandary krıptovalıýta aıyrbastaý pýnktin zańsyz quryp, tabys taýyp kelgenderdiń isin áshkerelegenin jazǵan edik.