Petropavlda birneshe kóp qabatty úı úsh kúnnen beri gazsyz otyr
Amaldary taýsylǵan kópqabatty úıdiń turǵyndary máseleni áleýmettik jelide jarııalady.
Aıtýlarynsha, Petropavldaǵy N.Nazarbaev kóshesindegi 294, 292, 290 úılerinde jeksenbiden beri gaz joq.
«Biz gaz jabdyqtarynda josparly jumys júrgizilip jatyr eken dep oıladyq. Keıin páterlerdiń birine plastık tereze ákelgen kóliktiń gaz qubyryn ilip áketkenin bildik. Oqıǵa jeksenbi bolǵandyqtan, gaz qubyryn der kezinde jaýyp, apatqa jol berilmedi.
Sodan beri gazsyz otyrmyz, eshkim jónder emes. Podezde jóndeý jumystary aıaqtalǵansha deıin gaz berilmeıdi degen habarlandyrý paıda boldy», - deıdi beınejazba ıesi.
Al apattyq qyzmet «gaz qubyryn bir aptanyń ishinde jónge keltiremiz» dep jaýap bergen.
«Bizdiń úıde kishkentaı balalary bar jáne zeınetkerler turatyn páterler kóp. Olardyń biren-saranynda ǵana elektr peshi bar. Nege biz bireýdiń uqypsyzdyǵy men nemquraılyǵynan zardap shegýimiz kerek.
Buǵan deıin 1,5 aıdyń ishinde jaqyn mańda sport kesheni salynyp jatqandyqtan úsh ret sýdan ajyratty. Endi gazsyz otyrmyz.
Kórshi úıdiń WhatsApp tobynda «kinálini taýyp, ol aıyppuldy ótemeıinshe gaz qubyry jóndelmeıdi degen» habarlama taraǵan», - deıdi Petropavl turǵyny.
Petropavl qalalyq ákimdigi baspasóz qyzmetiniń málimetinshe, turǵyn úılerge 10 qarashaǵa deıin gaz beriledi.
«5 qarasha kúni saǵat 9.30 shamasynda plastıkalyq terezelerdi montajdaýmen aınalysatyn uıymǵa tıesili "Gazel" avtokóliginiń júrgizýshisi N.Nazarbaev kóshesi, 292 mekenjaıyndaǵy úıdiń gaz qubyryn syryp ótken. Apattyq jaǵdaıǵa baılanysty N.Nazarbaev kóshesindegi 290, 292, 294 mekenjaılary boıynsha kóppáterli turǵyn úılerge suıytylǵan gaz berý toqtatyldy.
Qazirgi ýaqytta daıyndyq jumystary júrgizilýde, 8 qarashada qalpyna keltirile bastaıdy. Barlyq jumys 10 qarashada aıaqtalýy tıis. Keıin turǵyn úılerge gaz berile bastaıdy», - delingen jaýapta.