Petropavlda bir kúnde eki adam antıbıotıkten ólip kete jazdady

<p>PETROPAVL. KAZINFORM &ndash; Petropavlda antıbıotık ekpesin saldyrǵan eki adamda anafılaktıkalyq shok bolyp, jedel medıtsınalyq járdem qyzmetkerleri olardy ólimnen qutqaryp qaldy.</p>

Eki oqıǵa da 29 qańtarda bolǵan.

SQO Jedel medıtsınalyq kómek kórsetý ortalyǵynyń málimetinshe, birinshi jaǵdaıda ortalyqqa túske taman telefon qońyraýy túsip, 14 jastaǵy jasóspirimniń es-tússiz jatqandyǵy aıtylǵan. Oqıǵa ornyna kelgen mamandar balanyń qan qysymyn ólshegende 60/40 mm bolǵan.

Bala Tseftrıakson preparatyn alǵannan keıin 15 mınýttan soń óńi bozaryp, sýyq ter shyǵyp, qan qysymy kúrt tómendegen. Saldarynan esin joǵaltqan.

Oǵan shuǵyl medıtsınalyq kómek kórsetilip, aýrýhanaǵa jetkizildi.

Sol kúni saǵat 23.00 shamasynda «103» pýltine 40 jastaǵy áıeldiń es-tússiz jatqandyǵy týraly habar túsedi.

Feldsherler kelgende naýqastyń jaǵdaıy óte aýyr bolǵan, onyń estýi nasharlap, qan qysymy 20/0 mm deıin túsip ketken.

Bul joly da syrqat Tseftrıakson preparatyn qoıdyryp, 15 mınýt ishinde allergııalyq reaktsııa bergen. Mamandardyń kómeginen keıin áıel esin jınap, statsıonarǵa jatqyzyldy.

Dárigerlerdiń aıtýynsha, antıbıotıkterdi engizbes buryn ony allergııalyq reaktsııaǵa tekserý qajet. Ásirese Covid 19 pandemııasy kezinde keńinen qoldanylǵan tsefalosporınder tobynyń antıbıotıkterin (TsEF 3, Tseftrıakson, Tsefazolın jáne basqalar) qoldanǵan kezde asa abaı bolǵan jón.