Petropavlda bir apta esirtki jasyryp-taratqan jigit endi 15 jylǵa sottalýy múmkin
Soltústik Qazaqstan oblysy polıtsııa departamenti baspasóz qyzmetiniń málimetinshe, polıtseıler jas jigitti qańtar aıynda Petropavldaǵy kólikjaı kooperatıvteriniń birinde ustady. Bella esimdi qyzmettik-izdestirý ıtin qoldaný arqyly jigitten aq tústi untaq tárizdi zat salynǵan 25 túıinshek tabylyp tárkilendi. Saraptama nátıjesi tárkilengen zattyń jalpy salmaǵy 28,12 gramdy quraǵan «mefedron» dep atalatyn sıntetıkalyq esirtki ekenin kórsetti.
Tártip saqshylary aıtýynsha, jigit ınternet-dúkende tek bir apta ǵana jumys istep úlgergen.
«Esirtki satýshylar ońaı jolmen aqsha tabýdy ýáde etip, jastardy esirtki taratýǵa tartady. Beıhabar jastar buǵan senip, qomaqty aqsha tabamyz dep oılaıdy.
Qolymyzdaǵy aqparatqa sáıkes, kúdikti oblys ortalyǵyndaǵy esirtki satýmen aınalysatyn ınternet-dúkende esirtki jasyrýshy bolyp istegen. Osy «jumys» úshin aýdandardyń birinen kelgen. Endi asa iri mólsherde esirtki ótkizgeni úshin ol 10 jyldan 15 jylǵa deıingi merzimge bas bostandyǵynan aıyrylýy múmkin», - deıdi SQO PD Esirtki qylmysyna qarsy is-qımyl basqarmasynyń bastyǵy Rýslan Saparov.
Jyl basynan SQO polıtseıleri esirtki ótkizgen 36 adamdy qylmystyq jaýapkershilikke tartty, olardyń 20-sy – 18 ben 25 jas aralyǵyndaǵy jigitter.
Buǵan deıin Astanada avtokólikterdi zańsyz resimdeýshiler uıymdasqan qylmystyq top quryp, oǵan basshylyq jasaǵany úshin sottalǵandyǵyn aıtqan edik.