Petropavlda «Botaı» ART-galereıasy ashyldy
Konstıtýtsııa kúnine oraılastyrylǵan bul is-sharanyń óner súıer qaýym jáne qala turǵyndary úshin mańyzy zor. Zamanaýı galereıa týrıster baratyn tartymdy orynǵa aınalmaq.
Galereıanyń ataýy ulttyq kıeli oryndar tizimine engen «Botaı qonysy» arheologııalyq ornymen baılanysty. Bul jerde alǵash ret adamdardyń jylqyny qolǵa úıretkeni ǵylymı dáleldendi. Eskertkish bizdiń dáýirimizge deıingi IV-III myńjyldyqqa, eneolıt dáýirine jatady.
«1980 jyly bizdiń jerlesimiz, tarıh ǵylymdarynyń doktory, professor, belgili arheolog Vıktor Zaıberttiń basshylyǵymen arheologııalyq ekpedıtsııasy Aıyrtaý aýdany Imanburlyq ózeniniń mańaıynda Botaı qonysyn ashty. Osy Botaı qonysy týraly, onda tabylǵan jádigerlerdi kórsetip, jetistikterin halyqqa keńinen nasıhattaý, málimetter berý - bizdiń oblystyq mýzeı birlestigi jumysynyń negizgi baǵyttarynyń biri. Osy zamanaýı galereıa óńirdiń mádenı ortalyǵynyń biri bolady dep senemiz», - deıdi SQO tarıhı-ólketaný mýzeıiniń bólim meńgerýshisi Meıramgúl Ábýova.
Іs-sharaǵa belgili qazaqstandyq sýretshiler, músinshiler, Qazaqstan Sýretshiler odaǵynyń músheleri, sondaı-aq ardagerler, zııaly qaýym ókilderi jáne qala turǵyndary qatysty.
Galereıa ekspozıtsııasynda qazaqstandyq sýretshilerdiń kartınalary, I jáne II halyqaralyq «Botaı – Uly dala mádenıeti» sımpozıýmyna qatysýshy sýretshilerdiń týyndylary usynylǵan. Galereıanyń eskızdik jobasyn Qazaqstan Sýretshiler Odaǵynyń múshesi Bolat Áserbekov ázirledi.
Osyǵan deıin Petropavlda «Bir aýyl – bir ónim» jobasy aıasynda kórme ótkenin jazǵan edik.