Petropavlda bomba qoıylǵany týraly jalǵan habar taratqan adam sottaldy

PETROPAVL. QazAqparat – Petropavlda jarylǵysh qurylǵy týraly jalǵan habar berip, turǵyndar men arnaıy qyzmetterdi dúrliktirgen er adam bir jylǵa bas bostandyǵynan aıyryldy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, oqıǵa 14 aqpanda Petropavlda bolǵan. Mas kúıdegi er adam «102» arnasyna telefon shalyp, Zavodskaıa kóshesindegi úıdiń podezinde jarylǵysh zatpen turǵanyn aıtqan.

Oqıǵa ornyna patrýldik polıtsııa batalonynyń qyzmetkerleri, jarǵysh tehnıkter men basqa da shuǵyl qyzmetterdiń ókilderi kelip jetti. Tártip saqshylary úıdiń janynda mas kúıde júrgen er adamdy ustady. Tekserý barysynda onyń boıynan eshbir jarylǵysh qaýipti zat tabylǵan joq.

Bul fakti boıynsha QR Qylmystyq kodeksiniń «Terrorızm aktisi týraly kórineý jalǵan habarlaý» 273-babymen sotqa deıingi tergeý bastaldy.

Petropavl qalalyq soty «ázilkeshke» bir jyl merzimge bas bostandyǵynan aıyrý túrindegi jaza taǵaıyndaýǵa úkim shyǵardy.

«Er adamnyń zańsyz áreketi qalalyqtardyń tynyshyn alyp, demalysynyń shyrqyn buzdy. Osyndaı oqıǵalar menshik ıelerine materıaldyq shyǵyn keltire otyryp, arnaıy qyzmetterdiń jumysyna jıi kedergi jasaıdy, adamdardyń mazasyn alady, ǵımarattardy tekserý úshin turǵyndardy evakýatsııalaýǵa týra keledi. «Telefon terrorızmi» úshin QR QK 273-babynyń sanktsııasyna sáıkes iri kólemdegi aıyppul men 5 jylǵa deıingi merzimge bas bostandyǵynan aıyrý jazasy kózdelgenin esten shyǵarmaǵan jón», - deıdi SQO PD Ekstremızmge qarsy is-qımyl basqarmasynyń bastyǵy Rýslan Jarasbaev.

Buǵan deıin Petropavldaǵy dámhanalardyń birinde bolǵan janjaldan úsh adam pyshaq jaraqatyn alǵanyn aıtqan edik. Kúdikti ekeý ustalyp, olardyń bireýi ýaqytsha ustaý ızolıatorynda sýıtsıd jasady.