Petropavlda bıyl jańadan 6 saıabaq paıda bolady
Soltústik Qazaqstan oblysynyń ákimi Qumar Aqsaqalov Petropavlda qandaı jumystardyń atqarylyp, bıylǵa ne josparlanǵanyn aıtyp berdi.
«Petropavl – sońǵy 4 jylda tanymastaı ózgerdi. Osy aralyqta ony kórkeıtýge 4 mlrd teńge jumsaldy. Bul qarajatqa aýlalardyń ishine keshendi jóndeý júrgizildi. 4 jyldyń ishinde 386 aýlaǵa jańa asfalt tóseldi. Bıýdjet esebinen 45 tegin kólik turaǵy quryldy. 261 balalar alańy isteldi. Bıyl taǵy bul jumys jalǵasyp, 60 balalar alańy salynady», - dedi Qumar Aqsaqalov.
Oblys ákiminiń aıtýynsha, 2017 jyly oblys ortalyǵynda kóshelerdi zamanaýı jaryqtandyrý jobasy qolǵa alyndy. Nátıjesinde 40 kóshege jaryq dıodty 6,5 myń sham ornatyldy. Petropavlda 13 saıabaq paıdalanýǵa berilse, bıyl olardyń qataryna taǵy altaýy qosylady.
«Petropavl – tarıhqa baı shahar. Qala ishinde kóptegen tarıhı ǵımarattar saqtalǵan. Alaıda olardyń keıbiri jartylaı qıraı bastaǵan eken. Sol sebepti úsh jyl buryn biz olardy qalypqa keltirý jumystaryn bastadyq. Bul ǵımarattardyń ıelerimen kezdesip, ıesizderine jańa ınvestorlar taptyq. Qazir bul jumystardyń nátıjesin kórýge bolady. Kásipkerler Shamsýtdınov degen kópestiń úıin jónge keltirdi. Brýsılovskıı kóshesindegi, taǵy basqa ǵımarattar kúrdeli jóndeldi.
Vokzal mańy alańy jańa keıipke endi. Temirjol vokzaly kúrdeli jóndeýden keıin ashylyp, jolaýshylarǵa jaqsy jaǵdaı jasaldy. Endi olar aýyr sómkelerin baspaldaqpen tasymaıdy, nysanda eskalator men lıftter jumys istep tur», - dedi SQO ákimi Qumar Aqsaqalov.