Petropavlda bıyl 98 kásipkerdiń quqyǵy qorǵalyp, olardyń paıdasyna 107 mln teńge qarajat óndirilip alyndy
Soltústik Qazaqstan oblystyq prokýratýrasynyń málimetinshe, Petropavlda QR mindetti medıtsınalyq saqtandyrý týraly zańnamasyn buzǵany úshin 34 kásipkerlik sýbektisi jaýapkershilikke tartý merziminiń ótkendigine qaramastan, ákimshilik jaýapkershilikke tartylǵan. Petropavl qalasy prokýratýrasynyń qadalaý aktisi boıynsha laýazymdy tulǵalardyń zańsyz qaýlylary buzylyp, kásipkerlerdiń quqyqtary qorǵaldy. Sondaı-aq, kásipkerlik sýbektileriniń qyzmetine zańsyz aralasqany úshin bıyl memlekettik organdardyń 2 laýazymdy tulǵasy jaýapkershilikke tartyldy. Jalpy, jyl basynan beri oblys ortalyǵynda barlyǵy 98 kásipkerdiń quqyǵy qorǵalǵan, olardyń paıdasyna 107 mln teńgeden astam qarajat óndirilip alyndy, somasy 35 mln teńgege memlekettik satyp alýlar buzyldy. Memleket Basshysynyń tapsyrmasy boıynsha prokýratýra organdaryna mańyzdy ınvestıtsııalyq jobalardy súıemeldeý, kásipkerlerdi memlekettik organdardyń ozbyrlyǵynan jáne ákimshilik tosqaýyldardan qorǵaý júktelgen.
Qazirgi ýaqytta Petropavl aýmaǵynda 15 ınvestıtsııalyq joba júzege asyrylyp jatyr. Kásipkerlerdiń quqyǵyn qorǵaý maqsatynda Petropavl qalasynyń prokýratýrasynda mobıldik top jumys isteıdi. Mobıldik toptyń mindeti - bıznes sýektileriniń quqyqtaryn buzý faktileri boıynsha jedel áreket etý, quqyqtaryn qorǵaý jáne ornyna keltirý, quqyqtyq kómek kórsetý.