Petropavlda bıyl 150 adamǵa jalpy somasy 184 mln teńge shamasynda grant berilmek

PETROPAVL. QazAqparat – Petropavlda byltyr «Eńbek» baǵdarlamasy aıasynda 204 adamǵa 117 mln teńge grant berildi. Grant kólemi 583 myń teńge bolsa, bıyl ol eki esege artty, dep habarlaıdy QazAqparat tilshisi.

Petropavl ákimi Bolat Jumabekovtyń aıtýynsha, qala turǵyndaryn jumyspen qamtý basym baǵyttardyń biri. Byltyr oblys ortalyǵynda 3 221 jańa jumys orny quryldy, bul 2020 jyldan 209 orynǵa artyq.

Budan basqa 7 myńǵa jýyq adamnyń jumysqa ornalasýyna kómek kórsetildi, 6 myńy turaqty jumyspen, qalǵany áleýmettik, qoǵamdyq oryndarǵa jáne jastar tájirıbesi boıynsha ýaqytsha ornalastyryldy.

«Eńbek naryǵynda suranysqa ıe 14 mamandyq boıynsha qysqa merzimdi oqýdan 233 jumyssyz ótti, onyń ishinde elektrgazben dánekerleýshiler, elektrıkter, traktorshylar, qurylys salasyna qajet mamandar, omartashylar, býhgalterler, aspazshylar, tiginshiler, pesh salýshy jáne áleýmettik qyzmetkerler bar. Bıyl 300-ge jýyq adamdy oqytý josparda bar.

«Eńbek» baǵdarlamasy boıynsha «Bastaý Bıznes» jobasy aıasynda kásipkerlik negizderin 207 adam meńgerdi. 204 adam jalpy somasy 117,1 mln teńge grant aldy. Grant kólemi 583,4 myń teńge», - deıdi Petropavl ákimi.

Bıyl Memleket basshysy Q.Toqaevtyń tapsyrmasy boıynsha granttar mólsheri 200-den 400 AEK-ke deıin eki esege ulǵaıyp, 1 mln 225 myń teńge boldy. Osy jyly 150 adamǵa 183,7 mln teńge somasynda grant berý kózdelgen.

«Jyl basynda Petropavl kásiporyndary jumyspen qamtý ortalyǵyna myńnan astam bos jumys ornyn usyndy. Onyń 300-i qurylys salasynda. Jumys berýshi eńbekaqyny mamannyń biliktiligine jáne oryndalatyn jumys kólemine baılanysty 100 myń men 300 myń teńge aralyǵynda belgileıdi. Bilikti mamandardyń bolmaýyna baılanysty qurylys salasy kadr tapshylyǵyn bastan keshýde», - deıdi Bolat Jumabekov.