Petropavlda birneshe kúnnen beri kómir joq

PETROPAVL. QazAqparat – Petropavlda kómir tapshylyǵy týdy, temirjol tuıyqtarynda turǵyndar «qara altyndy» izdep sendelip júr, dep habarlaıdy QazAqparat tilshisi.

Petropavldaǵy temirjol tuıyqtarynda júk kólikteri jınalyp qalǵan. Keıbir júrgizýshiler kúte-kúte úılerine bos qaıtyp jatyr. Solardyń biri - Bolat degen azamat. 20 adamnan kómirdi túsirip berýge tapsyrys alǵan ol oblys ortalyǵyndaǵy barlyq kómir qoımalaryn aralap shyǵypty.

«Petropavldaǵy barlyq temirjol tuıyqtarynda kómir joq. Bul jaǵdaıǵa 4-5 kún boldy. Osymen kún kórip otyrǵan edim, búgingi kúnim taǵy da zaıa ketti», - deıdi Petropavl turǵyny.

Soltústik Qazaqstan oblystyq energetıka jáne turǵyn úı-kommýnaldyq sharýashylyǵy basqarmasynyń málimetinshe, óńir qys maýsymynda shamamen 400 myń tonnaǵa jýyq qatty otyn tutynady. Oblysqa «qara altyn» Ekibastuz, Maıkóbe, Qarajyra men Shubarkól ken oryndarynan jetkiziledi.

«391 myń tonna kómir qajet bolsa, sonyń 363 myńy óńirge jetti. Bul – 93 %. Qazir temirjol tuıyqtarynda 19 myń tonna kómir jatyr, onyń 560 tonnasy Petropavlda. Qazir Petropavlǵa 490 tonna maıkóbe, 280 tonna qarajyra kele jatyr. Ádette qyrkúıek-jeltoqsan aılarynda qatty otynǵa suranys kúrt artady. Sol sebepti biz jaz boıy turǵyndardy kómirdi erterek alyp qoıýǵa shaqyrdyq. Baǵa qymbattaǵan joq, 8,7 myń men 17 myń teńge aralyǵynda saýdalanyp jatyr», - deıdi SQO energetıka jáne turǵyn úı-kommýnaldyq sharýashylyǵy basqarmasy basshysynyń mindetin atqarýshy Baqyt Іlııasov.