Petropavlda bir balany mektepke ázirleýge orta eseppen 90 myń teńge kerek

PETROPAVL. QazAqparat – Petropavlda ata-analar mektep formasy men oqý quraldarynyń qymbattaǵanyn aıtady. Máselen 1-synypqa baratyn ul balany mektepke daıyndaýǵa orta eseppen 90 myń teńge qarajat ketedi, dep habarlaıdy QazAqparat tilshisi.

Árkim qaltasyna qaraı kósiledi. Dúkender men bazarlarda ekonom, premıým taýarlar da, tabysy orta tutynýshylarǵa negizdelgen mass-market ónim de jeterlik. Kópshilik árıne arzan baǵaǵa barynsha sapaly dúnıe alǵysy keledi. Jańa oqý jyly jaqyndaǵan saıyn saýda oryndarynda balasynyń kerek-jaraǵyn túgendep sabylǵan ata-ana kóbeıgen.

Petropavl turǵyny Anastasııa Resko eki balanyń anasy, qyzy 5-synypqa, kenje uly 1-synypqa barady. Aldymen balasyn kıindirmek.

«Ulymmen kelistim, qymbat sómke áperemin, ony 4 jyl ustaısyń dedim. Osylaısha sómkeni 25 myń teńgege aldym. Kostıým-shalbaryna 15 myń teńge jumsadym. Týflıdiń arzanyn aldyq 4 myń teńgege. Aýystyratyn ekinshi aıaq-kıimi bar. Sport kostıýmin, krossovkı aldym. Qazirdiń ózinde 70 myń teńge jumsadym. Áli shamamen 15 myń teńgedeı jumsaımyn dep oılaımyn. 12 bettik dápterdiń eń arzany 30 teńge, 47 teńgege de kórdim. Bári qymbat», - deıdi petropavldyq kelinshek.

Petropavldaǵy saýda oryndarynda taýar uqsas bolǵanymen, baǵasy ártúrli. Qymbatyna urynbaý úshin júrý kerek. Balalarǵa mamandandyrylǵan «Rastıshka» dúkeninde, máselen týflı 3 myń teńgeden bastalady. Shalbar men jeıdeni 3 myń teńgeden tabýǵa bolady. Sómke 3,5 myń teńgeden bastalady eken.

«Baǵa kúnde ósýde, biraq biz tómen baǵany ustaýǵa tyrysyp jatyrmyz. Ózimniń úsh balam bar. Ásirese birneshe oqýshysy bar ata-anaǵa balany mektepke daıyndaý qanshalyqty qıyn ekenin jaqsy túsinemin. Sol sebepti kóp balaly otbasylarǵa 10% jeńildik jasadyq. Jaǵdaıy jaqsy turǵyndarǵa arnalǵan taýarlar da bar, árkim qaltasyna qaraıdy ǵoı», - deıdi dúken ıesi Ásel Hamıtova.

Petropavlda qyzdarǵa arnalǵan jeıdeniń ortasha baǵasy 5-6 myń teńge, kostıým-shalbar – 11 myń, ıýbka – 5 myń, sarafan – 7 myń, sport kostıými - 12 myń, aıaq kıim 5 myń teńge shamasynda. Ul balanyń kostıým-shalbarynyń ortasha baǵasy - 15 myń teńge, jeıde - 5 myń, kúrte - 6 myń, shalbar – 6 myń teńge turady. Bylǵary emes týflı negizinen 4-5 myń teńgeden satylyp jatyr.

Keńse taýaryn arnaıy dúkennen satyp alǵan tıimdi. Keıbirin bazarǵa qaraǵanda eki ese arzanǵa alýǵa bolady. Máselen dúkende 12 tústi flomaster 550-600 teńge tursa, bazardaǵy baǵa 1000 teńgeden joǵary. 12 bettik dápterdi keńse taýaryn satatyn dúkennen 27 teńgege tabýǵa bolady.