Petropavlda bıyl otbasy shyrqyn buzǵan 300-ge jýyq adam qamaýǵa alyndy

<p>Petropavlda bıyl otbasylyq-turmystyq qatynastar salasynda 1141 quqyq buzýshylyq tirkeldi. 12 qylmys jasalǵan, onyń ekeýi kisi óltirý faktisi, al beseýi - densaýlyqqa qasaqana aýyr zııan keltirýge qatysty, dep habarlaıdy Kazinform.</p>

Óńirlik kommýnıkatsııalar qyzmetinde «Turmystyq zorlyq-zombylyqtyń aldyn alý» máselesi boıynsha Petropavl polıtseıleri esep berdi. Birinshi polıtsııa bólimi bastyǵynyń orynbasary Ábilqaıyr Qazjannyń málimetinshe, oblys ortalyǵynda profılaktıkalyq esepte túrli sanat boıynsha 2362 adam tur.
Jyl basynan otbasylyq-turmystyq qatynastar salasynda 1141 quqyq buzýshylyq tirkeldi. 874 adam jaýapqa tartylǵan, sonyń ishinde 85-i eskertý túrindegi jaza alsa, 294-i ákimshilik qamaýǵa alyndy. 491 materıal taraptardyń tatýlasýyna baılanysty toqtatylǵan.

«Densaýlyqqa qasaqana jeńil zııan keltirgeni úshin otbasylyq-turmystyq qatynastarda turǵan 89 adam jaýapqa tartyldy. Onyń 22-si eskertildi, 8-i ákimshilik qamaýǵa alyndy; 59 tarap tatýlasty.

Uryp-soǵý úshin 3 adam jazalansa, sonyń bireýi qamaldy.

Quqyq buzýshylarǵa qatysty 1105 qorǵaý uıǵarymy, 224 erekshe minez-qulyq talaptary shyǵaryldy», - deıdi Ábilqaıyr Qazjan.

Qoǵamdyq orynda mas kúıinde júrgeni úshin 4970 quqyq buzýshy ákimshilik jaýapkershilikke tartylǵan. Sonyń ishinde 367 adam ákimshilik qamaýǵa alyndy.

«Maskúnemdikten májbúrlep emdeý úshin Jambyl aýdany Blagoveşenka aýylynyń mamandandyrylǵan emdeý-profılaktıkalyq mekemesine 67 adam jiberildi, erikti negizde psıhıkalyq densaýlyq ortalyǵyna 34 maskúnem ornalastyryldy.

Jyl basynan otbasylyq-turmystyq qatynastar salasynda 12 qylmys jasaldy, sonyń segizinde qylmyskerler mas bolǵan. Sonyń ishinde kisi óltirýge qatysty eki fakti, densaýlyqqa qasaqana aýyr zııan keltirýdiń 5 faktisi, densaýlyqqa qasaqana aýyrlyǵy ortasha zııan keltirýdiń 3 faktisi tirkeldi», - deıdi polıtseı.