Petropavlda bıyl 53 kósheniń joly jóndeledi
Petropavl qalasy boıynsha partııalyq saılaýaldy baǵdarlamanyń iske asyrylýy, aldaǵy jylytý maýsymyna daıarlyq, oblys ortalyǵyn sýmen, gazben jáne elektrmen qamtamasyz etý máselesi. Osy jáne ózge de máseleler qalalyq máslıhattaǵy «AMANAT» depýtattyq fraktsııasynyń otyrysynda qaraldy.
Búginde Petropavlda jol sapasy ózekti máselelerdiń biri bolyp otyr. Keńeste qala ákimi Serik Muhamedıev byltyr uzyndyǵy 58 shaqyrym bolatyn 47 kóshede jol tósemi jańartylǵanyn aıtty. Bıyl oblys ortalyǵynyń 53 kóshesinde joldarǵa ortasha jóndeý júrgizý josparlanǵan. Onyń 39-ynda eshqashan asfalt bolmaǵan. Jıyn barysynda Petropavl basshysy turǵyn úı qurylysynyń qarqyny týraly da aıtty.
«Ótken jyly 191 myń sharshy metr turǵyn úı paıdalanýǵa berildi. Qazirgi ýaqytta 26 qurylys alańynda jumys qarqyndy júrip jatyr. Onyń 11-i bıýdjettik bolsa, qalǵany – kommertsııalyq úı. Halyq sanynyń ósýimen turǵyn úıge degen suranys artqan. 2024 jyldyń sońyna deıin 207,1 myń sharshy metrdi qoldanysqa berý mindeti tur. Búgingi kúni 21,4 myń sharshy metri salyndy», - dep atap ótti Serik Muhamedıev.
Petropavlda jylý jelileriniń 7,5 shaqyrymy da aýystyrylmaq. Sonymen qatar, osy jyly jergilikti bılik ókilderi sorǵy jabdyqtaryn jóndeý, bekitý armatýralaryn aýystyrý jáne jylý oqshaýlaǵyshty qalpyna keltirý jumystaryn júrgizýdi josparlaǵan.
«Bıyl Promyshlennaıa - Jýkov kóshesindegi jylý magıstrali boıynsha jumys júrgizilip jatyr. Bul qalanyń soltústik bóligi men ónerkásiptik aımaqtyń qajettiligin qamtamasyz etýge múmkindik beredi. Sondaı-aq, №5 jylý magıstraliniń qurylysy jalǵasady. Nátıjesinde Orman, Borkı shaǵyn aýdandary, jańadan salynyp jatqan áskerı akademııa ǵımaraty men jańa kásipkerlik nysandary ortalyqtandyrylǵan jylý júıesine qosylady», - dedi turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi basshysynyń mindetin atqarýshy Aıdyn Mákenov.
Buǵan deıin SQO-da «Ańsaǵan sábı» baǵdarlamasy aıasynda 21 otbasynyń sábı súıgenin jazǵan edik.