Petropavlda bıyl 53 kóshege asfalt tóseledi

<p>PETROPAVL. KAZINFORM &ndash; Soltústik Qazaqstan oblysynyń ákimi Ǵaýez Nurmuhambetov Petropavlda jóndelip jatqan kóshelerdi aralady. Jalpy 5 jyl ishinde oblys ortalyǵyndaǵy barlyq joldy jónge keltirý josparlanǵan.&nbsp;</p>

SQO ákimi Ǵaýez Nurmuhambetov áleýmettik jelidegi paraqshasynda Petropavldaǵy Lazýtın, Sútishev, Bolatbaev, Zelenaıa jáne Altyn dala kóshelerindegi joldardy jóndeý jumystaryn teksergenin jazdy.

Bıyl Petropavlda 53 kóshege asfalt tóseý josparlanǵan, sonyń 39-ynda buryn asfalt tósemi bolmaǵan. 

«Bul kósheler negizinen Jumysshy kenti, Borkı jáne Orman shaǵyn aýdandary sekildi qalanyń shetinde ornalasqan. Atqarylǵan jumystardyń sapasyn qatań qadaǵalap, jazdyń ashyq kúnderin tıimdi paıdalanýdy tapsyrdym. Jalpy, 5 jyl ishinde Petropavldaǵy barlyq joldy qıyrshyqtan asfalt tósendisine aýystyrý josparlanǵan», - dep jazdy Ǵaýez Nurmuhambetov. 

Sondaı-aq óńir basshysy qala basshylyǵy men aýdan ákimderine qańyrap bos turǵan jáne qaraýsyz qalǵan ǵımarattardy retke keltirýdi, menshik ıelerimen qajetti jumystardy júrgizýdi tapsyrdy. 

«Oblys ortalyǵynda qalanyń kórkin buzatyn ǵımarattar bolmaýy kerek», - dedi SQO ákimi. 

Buǵan deıin SQO-da jumysshynyń qolynyń basy astyqty jetkizetin ıirmekte qalyp qoıǵanyn habarlaǵan edik.