Petropavlda balyqshy qaıyqta uıyqtap ketip, sýǵa kete jazdady

PETROPAVL. QazAqparat – Petropavlda balyq aýlaýǵa shyqqan er adam qaıyqta uıyqtap ketip, gıdrotoraptyń ıirimine túse jazdady. Ózen aǵysymen qalqyp bara jatqan balyqshyny der kezinde polıtseıler kórip, aman alyp qaldy, dep habarlaıdy QazAqparat tilshisi.

Soltústik Qazaqstan oblysy polıtsııa departamentiniń málimetinshe, 37 jastaǵy petropavldyq balyq aýlaýǵa shyǵyp, tún ortasynda qaıyqta uıyqtap ketken.

Qaıyqta uıyqtap jatqan adamdy túngi saǵat 2.00 shamasynda Petropavl sý torabynda qyzmet etip júrgen mamandandyrylǵan kúzet qyzmeti basqarmasynyń qyzmetkerleri baıqaǵan. Rezeńke qaıyqty aǵys bógenge qaraı áketip bara jatyr eken. Er adam polıtseılerdiń aıqaıyn estimegen.

Polıtseıler jaýap bolmaǵasyn birden dıspetcherge habarlasyp, shandorany kóterý qajettigin aıtqan. Der kezinde kóterilgen metall arqalyqtar ıirimge túsip kete jazdaǵan qaıyqty ustap qaldy. Bul kezde tótenshe jaǵdaılar departamentiniń qyzmetkerleri de kelip úlgergen edi. Osylaısha balyqshyny qutqarý operatsııasy sátti aıaqtaldy.

«Túngi aýysymnan shyqqan soń, uıyqtamastan keshke qaraı balyq aýlaýǵa shyqtym. Qatty uıyqtap ketippin. Bul meniń ekinshi týǵan kúnim boldy, polıtseılerge kóp rahmet», - deıdi qutqarylǵan er adam.

Polıtseılerdiń aıtýynsha, sol kezde ár mınýt qymbat edi. Jyldam áreket etý qajet bolǵan. Qaıyqty birinshi baıqaǵan polıtsııa serjanty Aqylbek Ábdilmanovtyń aıtýynsha, polıtseılerdiń jumysynda kóp nárse qyraǵylyq pen jedel áreket etýdi qajet etedi. Petropavldaǵy gıdrotorap kúzetiletin nysan. Onyń janynda júrýdiń ózi qaýipti. Ókinishke oraı, petropavldyqtar muny árdaıym túsine bermeıdi.