Petropavlda balyq aýlaýǵa barǵan er adam sýǵa batyp ketti

PETROPAVL. QazAqparat – Petropavlda 56 jastaǵy er adam balyq aýlaýǵa baryp sýǵa batyp ketti. Bul bıylǵy shomylý maýsymy bastalǵaly tirkelgen alǵashqy oqıǵa, dep habarlaıdy QazAqparat tilshisi.

Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, oqys oqıǵa ótken aptada 7 maýsym kúni Petropavldaǵy «Vostochnyı bereg» dámhanasynyń mańynda bolǵan. Balyq aýlaýǵa kelgen er adam saǵat 13.00 shamasynda sýǵa ketti. Qutqarýshylar balyqshynyń denesin sol kúni tapty, aıtýlarynsha, qarapaıym erejelerdi saqtamaǵan, qutqarý jıleti bolmaǵan, spırttik ishimdik ishken.

«Vostochnyı bereg» dámhanasynyń janynda sýǵa shomylýǵa bolmaıdy. Osyndaı halyq baratyn oryndarǵa eskertý belgilerin qoıyp shyqtyq, biraq turǵyndar, demalýshylar ony ózdiginen alyp tastaıdy. Bul áreketten qaýip joǵalmaıdy. Sondaı-aq jaýapkershilikten de qutylmaıdy. Ákimshilik kodekste 364 bap bar, ıaǵnı bul ruqsat etilmegen jerge sýǵa shomylýǵa baılanysty. Birinshi ret eskertiledi, ekinshi ret bir jyldyń ishinde qaıtalasa aıyppul salynady. Kól basynda spırttik ishimdik ishkenderge de jaýapkershilik bar», - deıdi SQO TJD azamattyq qorǵanys basqarmasynyń bastyǵy Kırıll Ivannıkov.

Byltyr, mamandardyń aıtýynsha, bes adamnyń ajaly sýdan boldy. Qaza tapqandardyń 90%, sondaı-aq qutqarylǵan 31 adam da alkogoldi mas kúıde bolǵan.

SQO-da bıyl 13 kól men Esil ózeniniń boıynda 60 demalys orny jaraqtandyrylǵan.