Petropavlda áıel aýlada jasóspirim qyzdyń shashyn julyp, qysym jasady

<p>PETROPAVL. KAZINFORM &ndash; Petropavlda áıel óziniń qyzyn jaqtap, aýlada júrgen 10 jasar qyzdyń shashynan juldy. Qazir bolǵan oqıǵaǵa qatysty polıtsııa sotqa deıingi tergeý júrgizip jatyr.</p>

Oqıǵa 10 tamyz kúni Petropavldaǵy Ýhabov, 2 kóshesindegi aýlada bolǵan. Áleýmettik jelide taraǵan beınejazbadan áıeldiń jasóspirim qyzǵa kelip, qoqan-loqqy kórsetip, shashynan julǵanyn kórýge bolady. 

«Meniń jıenim Alısa Petropavl qalasy Radışev kóshesi, 35 meken-jaıyndaǵy aýlada qyzdardyń qolyndaǵy qoraptan shalajansar jatqan mysyqtyń balasyn kórgen. Ol birden veterınarǵa aparǵan, alaıda maman mysyqty qutqarýǵa kesh ekenin, óletinin aıtqan. Alısa ony úıge ákelgen soń, janýar birneshe saǵattan keıin óldi. Alısa qoraptyń ıesi qyzǵa baryp, odan mysyqqa ne bolǵanyn bilmek bolǵan, biraq ol „Jaman ıisi bolǵandyqtan, mysyqty men azaptadym“ dep aıqaılaı bastaǵan. Alısa qyzdy ıterip jiberdi, ol anasyna shaǵymdandy. Qyzdyń anasy júgirip shyǵyp, jıenime aıqaılap, shashyn juldy. Áıel polıtsııany ózi shaqyryp, aryzdandy. Endi polıtsııa Alısany tárbıe kórmegen dep esepke alaıyn dep jatyr», — dep jazǵan osy oqıǵaǵa qatysty Petropavl turǵyny. 

Soltústik Qazaqstan oblystyq Polıtsııa departamenti bul faktini rastady. 

«Osy fakti boıynsha polıtsııa qyzmetkerleri QR Qylmystyq kodeksiniń 109-1-baby 2-bóliginiń 8-tarmaǵy — „Kórineý kámeletke tolmaǵan adamǵa qatysty uryp-soǵý“ boıynsha sotqa deıingi tergep-tekserýdi júrgizedi. Birqatar qajetti saraptamalar taǵaıyndaldy, olardyń nátıjeleri boıynsha túpkilikti protsestik sheshim qabyldanatyn bolady», — dep jaýap berdi vedomstvonyń baspasóz qyzmetindegiler. 

Buǵan deıin Almaty oblysy Jambyl aýdanynda tórt balaǵa shabýyl jasaǵan kúdiktige qatysty tergeý aıaqtalǵanyn jazǵan edik.