Petropavlda avtokólik kópirinen qulaǵan áıel aman qaldy

<p>Petropavlda belgisiz jaǵdaıda avtokólik kópirinen qulaǵan áıel aman qaldy. Qamysqa oratylyp, júre almaı qalǵan 32 jastaǵy qala turǵynyn muzdaı sýdan polıtsııa qyzmetkeri alyp shyqty, dep habarlaıdy Kazinform.</p>

Soltústik Qazaqstan oblysy polıtsııa departamenti baspasóz qyzmetiniń málimetinshe, 18 qazan kúni saǵat 22:30 shamasynda Petropavl qalalyq polıtsııa basqarmasynyń "102" pýltine shaqyrtý túsken. Habarlasqan adam Esil ózeni arqyly ótetin avtomobıl kópiriniń janyndaǵy sýda jaǵaǵa shyǵa almaı jatqan áıelge kómek kerek dep habarlasqan. Qońyraý shalýshy áıel «zardap shegýshi abaısyzda qulady ma?» degen suraqqa jaýap bere almady.

Foto: SQO PD baspasóz qyzmeti

Oqıǵa ornyna patrýldik polıtsııa batalonynyń jaqyn mańdaǵy ekıpajdary jiberildi. Sondaı-aq, SQO Tótenshe jaǵdaılar departamentiniń qyzmetkerleri men jedel járdem qyzmeti shaqyryldy.

"Qarańǵyda áıeldi kóre almadyq, tek kómek suraǵan daýysy shyǵyp jatty. Ol qarańǵyda baǵytty joǵaltyp, jaǵadan alystap, qamys arasyna kirip ketýi múmkin. Jaǵadan jáne kópirdegi qyzmetkerler men qala turǵyndary meni baǵdarlap otyrdy. Shamnyń jaryǵyn kórgen áıeldiń ózi maǵan qaraı júrýge tyrysty, biraq ornynan qozǵala almady", - deıdi polıtsııa qyzmetkeri Oleg Golovın.

Tártip saqshysy muzdaı sýǵa kirip, qala turǵynyn qamystan bosatyp, jaǵaǵa alyp shyqty. Kelip jetken "Jedel járdem" tońyp qalǵan 32 jastaǵy Petropavl turǵynyn medıtsınalyq mekemege jetkizdi. Polıtsııa kishi leıtenanty Oleg Golovın kıimin aýystyryp, qyzmet ótkerýin jalǵastyrdy.