Petropavlda avtobýs jolaqysy qymbattaıdy
SQO kásipkerler palatasy baspasóz qyzmetiniń málimetinshe, Petropavl ákimi Rýslan Ańbaev jolaýshy tasymaldaýshylarmen kezdesip, olardyń máselelerine qanyqqan.
«Tarıfti kóteretin kez keldi. Bul, árıne, halyqtyń narazylyǵyn týdyrýy múmkin, biraq Petropavlda tarıf 2017 jyldan beri ózgermegenin jáne osy ýaqyt ishinde bári qymbattaǵanyn túsinýimiz kerek. Janar-jaǵarmaı, shyǵyn materıaldary, rezeńke, dóńgelekter, qosalqy bólshekter jáne t.b. kem degende eki ese qymbattady», – deıdi qala ákimi.
SQO «Avtokólik odaǵy» tasymaldaýshylar qaýymdastyǵynyń tóraǵasy Galına Semenovanyń aıtýynsha, eńbekaqy tómen bolǵandyqtan júrgizýshilerdi tabý qıyn.
Qazir bul salada kadr jetispeýshiligi máselesi ótkir tur.
«Biz qalalyq qoǵamdyq kólikte júrý aqysyn ósirýdi suraımyz. Bul bizdiń qazirgi jaǵdaıymyzdy aıtarlyqtaı jeńildetedi. Qostanaı 1 qańtardan bastap qolma-qol jáne qolma-qol aqshasyz esep aıyrysýlar úshin avtobýstarda jolaqyny ósirdi», - deıdi «KYZYLZHAR BUSES» JShS dırektory Baýyrjan Qusaıynov.
Petropavl ákimi bul máseleniń qazir talqylanyp jatqanyn aıtty, desek te, azamattardyń áleýmettik osal sanattary úshin tarıf ózgerissiz qalmaq.
«Ákimdik azamattardyń osy sanatyna kómektesip, jolaqyny arzandatyp, sýbsıdııalar esebinen tasymaldaýshylardyń shyǵyndaryn óteıdi. Búgingi tańda oqýshylar 40 teńge tólese, múgedekter úshin jol júrý tegin, biraq qala halqynyń basym bóligi úshin tarıf kez kelgen jaǵdaıda kóteriledi. Oǵan ýaqyt keldi, áıtpese men tasymaldaýshylardyń barlyq shyǵyndaryn sýbsıdııalar esebinen jabýǵa májbúr bolamyn, óıtkeni olarǵa jumys isteý tıimsiz bolyp qalady», - dedi Rýslan Ańbaev.