Petropavlda aýtıst balalarǵa merekelik shara uıymdastyryldy
Bul kúni aýtıst balaqaılar súıikti ertegi keıipkerlerimen sýretke túsýge, sondaı-aq karkasty vaakýmdy kınoteatrda mýltfılmder tamashalaýǵa múmkindik aldy. Merekege Esmuqan Jáken de kelipti. 13-tegi jasóspirim úshin mundaı kezdesýlerdiń mańyzy zor. Anasy Álııanyń aıtýynsha, balasynyń syrqaty týraly náresteniń 4 aılyǵynda estigen.
«Mundaı balalar erekshe kútimdi qajet etedi. Moıymaý kerek. Osyndaı is-sharalardyń jıi ótkizilgenin qalaımyz. Búgin barlyǵy bizge qatty unady. Psıhoterapııaǵa qatystyq, fılm tamashaladyq. Balalarymyzǵa osylaısha nazar aýdaryp, kóterińki kóńil kúı syılaǵan uıymdastyrýshylarǵa alǵys aıtamyz», - deıdi Petropavl qalasynyń turǵyny Álııa Jáken.
Oblystyq bilim basqarmasynyń bastamasymen uıymdastyrylyp otyrǵan is-sharanyń maqsaty - erekshe kútimdi talap etetin jandarǵa barynsha qoldaý kórsetý.
«Biz bul is-sharany aýtızm máseleleri bar balalardy mádenı is-sharalarǵa tartý maqsatynda, olardy áleýmettik-qoǵamdyq ómirge beıimdeý jáne olar basqa baldyrǵandarmen aralasýy úshin ótkizýdemiz. Oqýshylar saraıynda osy balaqaılarǵa arnap birneshe merekelik jáne sporttyq is-shara ázirledik», - deıdi oblystyq Bilim basqarmasynyń bas mamany Natalıa Serbına.
Mamandardyń aıtýynsha, 4 sáýirde tańǵy saǵat 10:00-de Petropavldaǵy Cinema Park kınoteatrynda tegin mýltfılm kórsetilimi bolady. Saǵat 15:00-de Sport saraıynda konkı tebýge múmkindik bar. 5 sáýirde tańerteń Kids Fun kóńil kóterý kesheninde balalar oıyn oınasa, saǵat 14:00-de Qýyrshaq teatrynda spektakl kóre alady. Sondaı-aq tústen keıin kópsalaly oblystyq balalar aýrýhanasy «ashyq esik kúnin» ótkizedi. 6 sáýirde saǵat 12:00-de Sport saraıy bul baldyrǵandardy tegin konkı tebýge shaqyrady.