Petropavlda attraktsıondar saıabaǵy ashyldy
«Attraktsıondar álemi» Petropavldaǵy ortalyq jáne Jeńis saıabaqtarynda jumys isteıdi. Bul qalalyqtardyń, ásirese balalardyń súıikti demalys oryny. Mundaǵy attraktsıondar biri qalmaı tekserilip, endi kelýshilerge qýanysh syılaýǵa ázir.
«Qaýipsizdik qashanda birinshi orynda bolýy qajet. Attraktsıondar paıdalaný qujatyna sáıkes maksımaldy túrde júktelip, bir saǵat boıy tehnıkalyq synaqtan ótedi. Bizdiń bas ınjener jáne qaýipsizdik tehnıkasy ınjeneri attraktsıondardy qaýipsiz paıdalaný boıynsha Máskeýde arnaıy kýrstan ótip keldi. Qalǵan mamandarymyz da únemi bilimin jetildirip turady», - deıdi «Attraktsıondar álemi» JShS dırektory Aleksandr Kozlov.
Byltyr attraktsıondar saıabaǵy karantınge baılanysty jaz boıy jumys istemeı, jabyq turdy. Tek maýsym aıynda karantın talaptary jeńildetilgende 17 kúnge ǵana ashyldy.
«Kúz jyly bolǵandyqtan byltyr 5 qazanǵa deıin jumys istedik. Osylaısha shyǵyndarymyzda jabýǵa múmkindik boldy. Bıyl karantın áli alynǵan joq. Sol sebepti kelýshilerge birneshe sanıtarlyq talap qoıylǵan. Ol maska kııý, qoldy dezınfektsııalaý jáne de áleýmettik ara qashyqtyqty saqtaý», - deıdi Aleksandr Kozlov.
«Attraktsıondar áleminiń» 50-ge jýyq átkenshegi bar. Bıyl kásipker kógaldandyrýǵa basa nazar aýdaryp, saıabaqty gúl baǵyna aınaldyrmaq. Osy maqsatta raýshan gúli men 100 myń dana bir maýsymdyq gúl egiledi.