Petropavlda arnaıy qyzmetter qaýipti ınfektsııalyq aýrýlarmen kúresýge ázir me?
Oqý-jattyǵýdyń stsenarııi boıynsha bezgek ustaǵan jolaýshy №623 poıyz arqyly Nur-Sultan qalasynan Petropavlǵa jetti. Temirjol qyzmetkerleri men dáriger-ınfektsıonıster poıyz toqtap turǵan ýaqytta syrqatqa medıtsınalyq kómek kórsetip qana qoımaı, bir vagondy tolyǵymen zararsyzdandyryp úlgerýi tıis. Mamandar birden iske kiristi. Sanaýly mınýtta barlyq qajetti is-sharany atqaryp úlgerdi.
«Stsenarıı boıynsha bezgek ustaǵan syrqat jolserikke óziniń aýyryp turǵanyn aıtady. Jalpy mundaı jaǵdaıda árqaısynyń atqaratyn jumys kestesi bar. Jolserik birden poıyz jetekshisine habar beredi, al ol óz kezeginde barlyq qyzmetterdi habardar etedi. Syrqattyń kimmen baılanysta bolǵany anyqtalyp, qajetti zerthanalyq synamalar alynady. Árıne ol birden aýrýhanaǵa jetkiziledi», - deıdi Kóliktegi qoǵamdyq densaýlyqty saqtaý basqarmasynyń Kókshetaý bólimshesiniń jetekshisi Bolat Nurmaǵambetov.
Dúnıejúzilik densaýlyq saqtaý uıymynyń málimetinshe, 2019 jyldyń 1 naýryzyna deıin álemde Denge bezgegin juqtyrǵandardyń sany 11 myńnan asyp ketken. 133 syrqat qaıtys bolǵan.
SQO Qoǵamdyq densaýlyqty saqtaý departamenti baspasóz qyzmetiniń habarlaýynsha, elimizde jyl basynan beri Denge bezgegin juqtyrǵandar sany 7 adamǵa jetti. Shetten kelgen qaýipti ınfektsııamen soltústikqazaqstandyqtar sońǵy ret 2017 jyly aýyrǵan eken. Denge bezgegin ol kezde Taıland pen Vetnamda bolǵandar ákelgen.
Departament mamandary shetelge shyqpas buryn ondaǵy epıdemıologııalyq jaǵdaımen aldyn ala tanysýǵa keńes beredi. Elimizde basqa memleketke jol júretinderge ekpe jasalmaıdy. Sol sebepti ár adam jeke basy qaýipsizdik erejelerin saqtaǵany abzal. Eń qarapaıymy - shybyn-shirkeı, kenege qarsy repellentterdi qoldaný.