Petropavlda Arızona ýnıversıtetiniń oqý baǵdarlamasy iske qosyldy
Saltanatty is-sharaǵa QR Joǵary bilim jáne ǵylym mınıstri Saıasat Nurbek, Soltústik Qazaqstan oblysynyń ákimi Qumar Aqsaqalov, AQSh Elshiliginiń ókilderi jáne Arızona ýnıversıtetiniń seriktesteri, qyzmetkerler men stýdentter jáne olardyń ata-analary qatysty.
«Arızona ýnıversıtetimen birge qos dıplomdyq oqý baǵdarlamasyn engizý jergilikti joǵary oqý ornynyń jalpy damýyna zor úles qosatyny sózsiz. Qazirdiń ózinde 170 stýdentti qabyldadyq. Olar elimizdiń túkpir-túkpirinen kelip otyr. Bolashaqta memlekettik grant sanyn 500-ge deıin jetkizýdi josparlap otyrmyz. Bul bizdiń ekonomıkamyz úshin qajet kadrlyq rezerv bolmaq», - deıdi Soltústik Qazaqstan oblysynyń ákimi Qumar Aqsaqalov.
Qos dıplomdyq oqytý úsh tilde - aǵylshyn, qazaq jáne orys tilderinde júzege asady. Jastar IT, ınjenerııa, agrotehnologııa bilim baǵyttary boıynsha mamandyq alyp, Qozybaev ýnıversıteti men Arızona ýnıversıtetiniń dıplomdaryna ıe bolady.
«Bul joba Qazaqstan úshin, óńir úshin, Prezıdent úshin óte mańyzdy joba. Memleket basshysynyń tapsyrmasymen Qazaqstanda 2025 jylǵa deıin 5 sheteldik myqty joǵary oqý oryndarynyń fılıaldary ashylady. 2 qyrkúıekte biz Atyraýdaǵy Safı Ótebaev atyndaǵy munaı jáne gaz ýnıversıtetiniń negizinde Reseıdiń Gýbkın atyndaǵy munaı jáne gaz ýnıversıtetiniń fılıalyn ashtyq. Búgin Petropavlda, M.Qozybaev atyndaǵy Soltústik Qazaqstan ýnıversıtetinde Arızona ýnıversıtetiniń fılıalyn ashamyz. 12 qyrkúıekte Ál-Farabı atyndaǵy qazaq-ulttyq ýnıversıtetiniń negizinde MIFI – Máskeý ınjenerlik-fızıkalyq ınstıtýtynyń fılıaly ashylmaq. Kelesi jyly Nur-Sultan qalasynda Mıchıgan ýnıversıtetiniń pedagogıkalyq arnaıy ınstıtýty ashylmaq.
Bul jobalar nelikten mańyzdy jáne nelikten tabysty bolady? Birinshiden Prezıdentimizdiń nazarynda tur. Tolyq resýrs jaǵynan da, ınfraqurylym, grant jaǵynan da másele bolmaıdy. Ǵylymǵa, joǵary bilimge nazar aýdarylady, oǵan jańa mınıstrliktiń ashylýy dálel. Ekinshiden jas, myqty, shetelde oqyǵan bilimdi mamandardy joǵary bilim salasyna shaqyryp, kadrlardy almastyryp jatyrmyz. Bul komandaǵa biz tolyq senemiz, qoldaımyz. Úshinshiden ǵylymǵa Prezıdenttiń tapsyrmasymen arnaıy bıýdjet bólinip, joǵary oqý oryndarynyń negizindegi ǵylym damytylmaq», - deıdi Saıasat Nurbek.
Mınıstrdiń aıtýynsha, Arızona ýnıversıteti sońǵy 5 jyl boıy álemniń úzdik ýnıversıtetteriniń qatarynda keledi. Ol jerde 4700 ustaz sabaq beredi. Onyń beseýi – Nobel syılyǵynyń laýreaty, jeteýi – Pýlıttserov syılyǵynyń ıegeri. Sondyqtan qazaq jastary eń úzdik degen ustazdarmen baılanysta bolyp, bilim almaq.