Petropavlda anyqtalǵan qańǵybastardyń basym deni 30-44 jasta

PETROPAVL. QazAqparat – Petropavlda kúnniń sýytýyna baılanysty polıtseıler kúndelikti reıd ótkizip, turǵylyqty mekenjaıy joq adamdardy anyqtap jatyr, dep habarlaıdy QazAqparat tilshisi.

Soltústik Qazaqstan oblystyq Polıtsııa departamenti baspasóz qyzmetiniń málimetinshe, Petropavl qalasy polıtsııa basqarmasynyń qabyldaý-taratý ornynyń jınaý toby qyzmetkerleri qańǵybastardy anyqtaý úshin kúnde reıdke shyǵady. Mobıldi top kúndizgi saǵat 15.00-den 23.00-ge deıin jumys isteıdi. Polıtseıler kezbeler jıi shoǵarlanatyn jylý trassalaryn, káriz qudyqtaryn, qoqys tastaıtyn jerlerdi, shaǵyn bazarlardy, vokzaldardy tekseredi.

«Túnde aýa temperatýrasy – 10 gradýsqa deıin jetedi. Úısiz-kúısiz júrgender úsikke shalynbas úshin jáne jazataıym oqıǵalarǵa jol bermeý maqsatynda ár jerden jınalǵan qańǵybastardy Jumysshy kentiniń shetinde ornalasqan túngi túneý bólimshesine túneýge jetkizemiz. Biraq eń aldymen olar iz-túzsiz joǵalǵandar bazasy, qylmys jasaǵany úshin izdestirýdegi jáne basqa da esepter boıynsha tekseriledi. Jyl basynan beri izdeýde júrgen 5 adamdy anyqtadyq, olardyń bireýi qylmysker, tórteýi túrli quqyq buzýshylyqtardy jasaýda kúdiktiler», - deıdi Petropavl qalasy polıtsııa basqarmasy qabyldaý-taratý ornynyń bastyǵy Adaı Smaılov.

Jyl basynan beri qalalyq polıtseıler turǵylyqty mekenjaıy joq 192 adamdy, onyń ishinde 139 er adam men 53 áıeldi esepke qoıdy. Anyqtalǵan qańǵybastardyń basym bóligi – 30 ben 44 jas aralyǵyndaǵylar, osyndaı barlyǵy 81 adam ustaldy. 18 ben 29 jas aralyǵyndaǵy – 39, jasy 45-ten asqan 21 adam anyqtalǵan.

Adaı Smaılovtyń aıtýynsha, jalpy jyl basynan beri qabyldaý ornyna 1609 adam jetkizilgen. Onyń 192-si sottyń sanktsııasymen ornalastyrylǵandar. Eger turǵyndar turǵylyqty mekenjaıy joq adamdardyń jınalǵanyn kórse, onda 8 [phone] telefony boıynsha qabyldaý-taratý ornynyń kezekshi bólimine nemese táýlik boıy jumys isteıtin 102 nómirine habarlasa alady.