Petropavlda 700-den astam adam kóshede qulap, jaraqat aldy

<p>Qarasha aıynda Petropavldyń 720 turǵyny kóshede ketip bara jatyp, taıǵanaqtan qulap, jaraqat aldy. Travmatologtar kóktaıǵaq kezinde jaraqat almaý joldaryn jáne qulaǵan ne isteý kerek ekenin aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a> tilshisi.</p>

Kópsalaly qalalyq jedel járdem aýrýhanasynyń baspasóz qyzmeti demalys kúnderi jedel járdem qyzmetine 121 adam júgingenin habarlady. 56 adamnyń qabyrǵasy synǵan, 32 adam jaraqat alyp, 17 adam shuǵyl túrde aýrýhanaǵa jatqyzyldy. Zardap shekkenderdiń kóbi qart adamdar.

Travmatologııalyq pýnkt meńgerýshisi Valerıı Grıbanov kóktaıǵaq kezinde adamnyń kóbinese bilegi, shyntaǵy nemese ıyǵy shyǵyp ketetinin aıtty. Sebebi qulaǵan kezde adam ınstınktıvti túrde qoldaryn sozyp, sozylǵan qolyna qulaıdy. Egde jastaǵy adamdarda fızıologııalyq erekshelikterge baılanysty jambas moınynyń syný qaýpi joǵary.

— Qulap bara jatqan jaǵdaıda barynsha ózińizdi bos ustaýǵa tyrysyńyz. Qyzyq estilýi múmkin, biraq bulshyqetterdiń tyǵyzdyǵy syný yqtımaldyǵyn arttyrady. Artqa qulasańyz, basyńyzdy qorǵaý úshin ıegińizdi keýdege qysyńyz. Eger aldyńyzben qulasańyz, basyńyzdy basqa jaqqa burańyz. Qoldaryńyz búgilip, túzý sozylmaýy kerek. Qulaǵan soń asyqpaı turyp, qaı jerińiz aýyryp turǵanyn bilý kerek. Eger bir jerińiz qatty aýyryp nemese basyńyz aınalsa, jaǵdaıdy qıyndatpaý úshin jedel járdemdi kútken durys,-dep keńes berdi maman.