Petropavlda 7 mektepte balalardy atamyz dep áleýmettik jelini shýlatqandar izdestirilip jatyr

<p>PETROPAVL. KAZINFORM &ndash; Soltústik Qazaqstan oblysy polıtsııa departamentiniń qyzmetkerleri Petropavl qalasynyń birneshe mektebine shabýyldaımyz dep áleýmettik jelide jazba qaldyrǵandardy izdestirip jatyr.</p>

Telegram, WhatsApp messendjerleri arqyly lezde taralyp ketken jazbada belgisiz bireýler shabýyldy 19 aqpan, dúısenbi kúni jasaıtynyn jazǵan.

Aıtýynsha, nysanada Petropavldaǵy № 13,32,4,10,23,9 mektepter jáne Best gımnazııasy.

Foto: áleýmettik jeliden

Sol kúni mektepke qarý-jaraq ákelip, qantógis uıymdastyrmaq. 

Ata-analardyń záresin ushyrǵan jazbaǵa qatysty SQO polıtsııa departamenti túsinik berdi.

«Oqý oryndarynda qaýipsizdikti qamtamasyz etý jáne kúzetti kúsheıtý boıynsha qajetti sharalar qolǵa alyndy. Bir kún buryn polıtsııaǵa qala mektepteriniń oqýshylaryna qaýip tóndiretin posttar ornalastyrylǵan anonımdi Telegram-arnanyń bar ekendigi týraly aqparat kelip tústi. Osy jarııalanymdardyń avtoryn anyqtap, mazmunyn tekserýge oblystyq jáne qalalyq polıtsııanyń jedel qyzmetteri men beıindi bólimsheleriniń qyzmetkerleri tartyldy. Bul másele polıtsııa departamenti basshylyǵynyń jeke baqylaýynda» delingen habarlamada.

Foto: áleýmettik jeliden

Sondaı-aq polıtseıler daıyndalyp jatqan terrorızm aktisi týraly kórineý jalǵan habar úshin 5 myń AEK mólsherinde, ıaǵnı 18 mln teńgeden astam aıyppul salynatynyn, nemese 5 jylǵa bas bostandyǵynan aıyrý jazasy qoldanylatynyn eske salady.

Jýyrda Aqtóbe men Pavlodarda áldebireýler mektepke baryp, oqýshylarǵa oq jaýdyramyz dep qorqytqan edi.

14 aqpanda Qaraǵandyda dál osyndaı jalǵan aqparat úshin 13 jasar bala ustaldy.

Qostanaıda da mektepte oq atylady dep habarlaǵan 10 jasar oqýshy bolyp shyqty.