Petropavlda 5 myńǵa jýyq otbasy «Birgemiz» qorynan kómek aldy

PETROPAVL. QazAqparat – Petropavlda kómekke muqtaj 4875 otbasy Elbasynyń tapsyrmasynan keıin 50 myń teńgeden járdemaqy aldy, dep habarlaıdy QazAqparat tilshisi.

«Nur Otan» partııasy Soltústik Qazaqstan oblystyq fılıaly baspasóz qyzmetiniń málimetinshe, «Birgemiz» qorynan petropavldyqtarǵa qarjy aýdaryldy. Járdemaqy turmysy nashar, áleýmettik az qamtylǵan otbasylarǵa berildi.

«Elbasy Nursultan Nazarbaevtyń tapsyrmasynan keıin bul jumystar birden qolǵa alyndy. 4875 otbasyǵa 50 myń teńge esepshottaryna tústi. Ol úshin eshqaıda barýdyń, aryz jazýdyń qajeti joq. Alýshylardyń tizimin jergilikti bılik organdary ázirledi. Osy tizimge baılanysty tólem jasaldy. Bul joly buryn almaǵan adamdar aldy», - deıdi «Nur Otan» SQOF tóraǵasynyń orynbasary Ásem Rahmetova.

Járdemaqyny birinshi bolyp alǵandardyń qatarynda Borıs Kýznetsov bar.

«Men úshin kútpegen qýanyshty jaǵdaı boldy. Jaqynda ǵana aýrýhanadan shyqtym. Bul aqsha qazirgi ýaqytta maǵan úlken kómek boldy. Osyndaı aktsııanyń bolǵany qandaı jaqsy», - deıdi Petropavl turǵyny.

«Birgemiz» qorynan bir rettik járdemaqy 7 sanatqa jatatyn adamdarǵa beriledi, olar: az qamtylǵan kóp balaly otbasylar, muqtaj múgedekter, asyraýynda múgedek balasy bar otbasylar, tómen zeınetaqy alatyn zeınetkerler, jetim balalar, soǵys ardagerleri jáne tyl eńbekkerleri.

Járdemaqy osymen besinshi ret berildi. Buǵan deıin mundaı kómek SQO-da 18 myń 886 adamǵa kórsetilgen.