Petropavlda 40 kúndik áskerı daıarlyqtan ótken azamattar ant qabyldady
Áskerı-tehnıkalyq mekteptiń túlekteri 40 kún boıy daıyndyqtan ótip, bir jyldyq materıaldy tolyǵymen qamtydy. Áskerı polıgondarda bolyp, oqý-jattyǵýlardan ótti. Oqýǵa túskender jasy - 24-27 aralyǵynda.
Aıbek Nurǵalıev Qostanaı oblysynyń Arqalyq qalasynan kelgen. 24 jastaǵy túlek búgin kóppen birge ant qabyldady. Endi ol bolashaǵyn áskerı qyzmetpen baılanystyrmaq.
«Áskerı-tehnıkalyq mektepte bilimimdi jetildirdim. Óte yńǵaıly, bir jyldyq áskerden eshqandaı kem emes daıyndyqtan óttik. Şýche qalasynda ornalasqan Kadet korpýsyna qarasty «Amandyq» oqý ortalyǵyna bardyq. Ol jerde jalpy qarý-jaraqpen tanysyp, nysanaǵa kózdep atýdy jetik meńgerdik, komandırler bárin úıretti, áskerı jarǵylarǵa sáıkes barlyq berilgen tapsyrmalardy naqty jáne dálme-dál oryndadyq. Ant qabyldaǵannan keıin Otan aldyndaǵy qyzmetimizdi óteımiz degen senimdemin», - deıdi áskerı-tehnıkalyq mekteptiń bólimshe komandıri Aıbek Nurǵalıev.
Aıta ketken jón, bıyl áskerı-tehnıkalyq mektep 500-den asa azamatty oqytýǵa tapsyrys alǵan. Byltyr osy oqý ornyn bitirgen 200-den asa túlek qazir elimizdegi áskerı bólimshelerde qyzmet etip júr.
«Jastardyń búginde áskerı qyzmetke umtylýshylyǵy baıqalady. Óıtkeni áskerı qyzmet turaqty jáne áleýmettik jaǵynan qamtylǵan. 10 jylǵa deıingi qyzmettik ótili bar áskerı qyzmetshiler úıleri bolmaǵan jaǵdaıda olarǵa baspanany jaldaǵany úshin memleket ótemaqy tóleıdi. Al 20 jáne odan da kóp jyl qyzmet etken áskerı qyzmetshilerge otbasy músheleriniń sanyna baılanysty páter satyp alý úshin aqshalaı ótemaqy beriledi. Sondaı-aq barlyq garnızondar men áskerı bólimshelerde áskerı qyzmetshiler medıtsınalyq qyzmetterdi áskerı mekemelerde tegin alady», - deıdi SQO Qorǵanys isteri departamenti baspasóz qyzmetiniń bastyǵy Aıman Ábjapbarova.
Petropavlda áskerı-tehnıkalyq mektepterge úmitkerlerdi irikteý jylyna 7-8 ret ótkiziledi. Bul oqý ornyna túsý úshin kandıdattardy irikteýdi jergilikti áskerı basqarý organdary júzege asyrady.